وزگەرمەيتىن ءبىر عانا نارسە: كورەرمەنگە ءاردايىم قىزىقتى بولۋ - Jibek Joly ديرەكتورى
استانا. KAZINFORM - ەكى جىل بۇرىن «Kazakh TV» تەلەارناسىنا رەبرەندينگ جۇرگىزىلدى جانە «Jibek Joly/ Silk Way» شەتەلدە حابار تاراتاتىن جالعىز قازاقستاندىق سپۋتنيكتىك تەلەارناسى بولىپ قايتا قۇرىلدى.
ب ا ق قىزمەتكەرلەرى كۇنىنە وراي، تەلەارنانىڭ باسقارۋشى ديرەكتورى ەركەجان كۇنتۋعان اگەنتتىككە سۇحبات بەردى جانە جاڭا ماۋسىمدا قانداي قىزىقتى جوبالار كورەرمەن نازارىنا ۇسىنىلاتىنىن ايتىپ بەردى.
− بيىل «Jibek Joly» تەلەارناسىنا 2 جىل تولادى. تەلەارنا بىرتىندەپ رەيتينگتەر جيناپ كەلەدى. ال «Silk Way» مەن «Silk Way Cinema» جوبالارىن ىسكە قوسۋ - ەكسپەريمەنت بولدى ما؟
− تەليەۆيزيا - بارلىق ۋاقىتتا ەكسپەريمەنت الاڭى بولا بەرمەيدى، مۇنىمەن كەلىسەتىن شىعارسىز. ال وعان جۇگىنگەندە بولۋى مۇمكىن بارلىق سالداردى مۇقيات باعامداۋ كەرەك.
− قازىر قاراساق، تاجىريبەڭىز ءساتتى شىققان سەكىلدى؟
− «Silk Way» تەلەارناسىنىڭ جاڭا فورماتتا ىسكە قوسىلعانىن ساتتىلىك دەپ سانايمىز. ءبىز «Kazakh TV» تەلەارناسىنىڭ رەبرەندينگىن جۇرگىزدىك. بۇگىندە «Silk Way» شەتەلدە حابار تاراتاتىن جالعىز قازاقستاندىق سپۋتنيكتىك تەلەارنا بولىپ وتىر. اعىلشىن تىلىندە بىرنەشە باعدارلاما اشىلدى، ولار - «New time» اقپاراتتىق- تالدامالىق باعدارلاماسى، «Reporter with President» ارنايى جوباسى، «Travel and comfort» «Taste Kazakhstan» باعدارلامالارى.
ايتا كەتەرلىگى، «Silk Way» ەكسكليۋزيۆتى ماتەريالدارىنا ت ا س س، CGTN، Al Jazeera, CCTV سەكىلدى الەمنىڭ كوپتەگەن كوشباسشى اقپارات قۇرالدارى سىلتەمە جاسايدى.
قازىرگى ۋاقىتتا «Silk Way» التى تىلدە - قازاقشا، ورىسشا، اعىلشىنشا، وزبەكشە، قىرعىزشا جانە تۇرىكشە ەل اۋماعىنان تىس جەرلەردە حابار تاراتادى.
وتكەن جىلدىڭ قىركۇيەگىندە ىسكە قوسىلعان «Silk Way Cinema» جاقىن ورنالاسقان 10 نان استام ەلدە تاۋلىك بويى كورسەتىلىپ كەلەدى. «Silk Way Cinema» ارناسىن قازاقستاندىق كرەاتيۆتى يندۋستريانىڭ امباسسادورى دەۋگە بولادى. تەلەارنا كونتەنتى تەك قانا قازاقستاندىق ونىمدەردەن قۇرالعان. ەڭ الدىمەن «قازاقفيلمنىڭ» التىن قورىنان جانە رەسپۋبليكالىق تەلەارنالارىمىزدان الىنعان كينوكارتينالار ۇسىنىلادى.
− كونتەنت تاقىرىبىنا ويىسساق، «Jibek Joly» تانىمالدىعىنا نە اسەر ەتتى دەپ ويلايسىز؟
− بارىنەن بۇرىن، باسقا تەلەارنالاردا كەزدەسپەيتىن بىرەگەي جانرلارداعى الەۋمەتتىك جوبالار دەر ەدىم. ارينە، مۇندا «ناشا يستوريا» دەرەكتى- كوركەم سيكل فيلمىن ايتۋعا بولادى، وندا اۆتور قازاق حالقىنىڭ ەڭ كورنەكتى تۇلعالارىنىڭ ءومىرى مەن شىعارماشىلىعى تۋرالى قىزىقتى جانە بەيمالىم فاكتىلەردى باياندايدى. شەتەلدىك وتباسىلار اسىراپ العان قازاقستاندىق بالالاردىڭ ومىرىنەن سىر شەرتەتىن «شەتەلدەگى قازاق بالالارى» دەرەكتى دراماسى بار. ءدال وسى قاتاردا «انا بولعىم كەلەدى» رەاليتي- جوباسى تۇر. جوبا اياسىندا ەرلى- زايىپتىلار ەكو باعدارلاماسىنان وتەدى. كورەرمەندەر ولاردىڭ اتا- انا بولۋعا ۇمتىلىسىنداعى كۇرەسىنە، ۇمىتىنە، كەيدە ساتسىزدىكتەرىنە كۋا بولادى.
«ورەل ي رەشكا. كازاحي» حالىقارالىق travel-شوۋى دا ەرەكشە نازار اۋدارۋعا تۇرارلىق. «ۇكىمەت. Live» جانە « ءماجىلىس. Live» جوبالارىندا تىكەلەي ەفيردە ۇكىمەت پەن پارلامەنتتىڭ جۇمىسىن كورسەتەمىز. اتقارۋشى جانە زاڭ شىعارۋشى ورگانداردىڭ عيماراتىنا ورناتىلعان ءموبيلدى ستۋديالار وزەكتى ماسەلەلەردى تالقىلايتىن اشىق ديالوگ الاڭىنا اينالدى.
− جاڭا ماۋسىمعا جوسپارلارىڭىز قانداي؟ نە نارسەگە باسىمدىق بەرەسىزدەر؟
− ەڭ الدىمەن كونتەنتتىڭ ساپاسىنا باسىمدىق بەرمەكپىز. ءتۇرلى جانرداعى وتاندىق سەريالداردى قازاق تىلىندە جارىققا شىعارامىز. ماسەلەن، شىنايى وقيعالارعا نەگىزدەلگەن «111» Juz on bir» دەتەكتيۆتى دراماسى كورەرمەنگە جول تارتادى. جوبا 40 سەريادان تۇرادى. بۇل - ءبىر ماۋسىمداعى سەريال ءوندىرىسى بويىنشا قازاقستاندىق كينووندىرىس نارىعىنداعى رەكورد. باستى رولدە وتباسىلىق زورلىق- زومبىلىقتىڭ الدىن الۋ ءبولىمىنىڭ قىزمەتكەرلەرى بولادى.
ەكىنشى سەريال «ديۆان باتىر» دەپ اتالادى، بۇل كومەديالىق مەلودراما، ونىڭ ءتۇسىرىلىمى ەلدىڭ وڭتۇستىگىندەگى ناعي ىلياسوۆ اتىنداعى تابيعاتى كوركەم اۋىلدا ءوتىپ جاتىر. جانرىن ەسكەرسەك، سەريال كورەرمەندەردىڭ كوپشىلىگىن قۋانتادى دەپ ويلايمىز. سونداي- اق، «تاماشا» ساتيرالىق تەاترىن ءسۇيىپ تاماشالاعان اۋديتورياعا توسىنسىي ازىرلەۋدەمىز. بۇل اڭىزعا اينالعان تەاتردىڭ، قازاق تەليەۆيزياسىنىڭ بىرەگەي باعدارلاماسىنىڭ اكتەرلەرى مەن اۆتورلارىنىڭ شىعارماشىلىعى تۋرالى سەريال. ءبىزدىڭ جوسپارىمىزدا تاعى ءبىر ۇلكەن جوبا بار. ول جونىندە جاڭا جىلعا قاراي اڭداتپا جاسايمىز.
قازىرگى ۋاقىتتا «تازا قالا» تەلەجوباسىن ىسكە قوستىق، بۇل ەل پرەزيدەنتى قاسىم- جومارت كەمەل ۇلى توقايەۆتىڭ «تازا قازاقستان» باستاماسى اياسىندا قولعا الىندى. ازىرگە ەلىمىزدىڭ 4 قالاسىندا ءتۇسىرىلىم جۇمىستارى ءوتتى. كورەرمەندەر ونىڭ جالعاسىن جاڭا ماۋسىمدا دا كورە الادى.
− «Jibek Joly» تەلەارناسى باسقا رەسپۋبليكالىق ارنالارمەن قاتار وليمپيادا ويىندارىن تىكەلەي ەفيردە كورسەتەتىن بولدى. بۇل جۇمىسقا دايىنسىزدار ما؟
− دايىنبىز. ءبىز كورەرمەنىمىزگە پاريجدەگى وليمپيادالىق جارىستاردىڭ اڭىزعا اينالاتىن ساتتەرى مەن قىزىقتى وقيعالارىن قولجەتىمدى ەتۋگە تىرىسامىز. ارينە، قازاقستاندىق اتلەتتەر باعدارلامالاردىڭ، ارنايى جاڭالىق شىعارىلىمدارىنىڭ كەيىپكەرلەرى بولادى. قازاقستان قۇراماسى ەيفەل مۇناراسىنىڭ كىشكەنە بولشەگى بار مەدالداردى كوپتەپ جەڭىپ الادى دەپ ۇمىتتەنەمىز.
تاعى ايتقىم كەلەتىنى، ءبىزدىڭ تەحنيكالىق مۇمكىندىكتەرىمىز الەمنىڭ كەز كەلگەن جەرىندە، ءتىپتى ەڭ قيىن جاعدايلاردا دا ونلاين- ترانسلياتسيالاردىڭ ساپاسىن قامتاماسىز ەتە الادى.
− سىزدەردىڭ كورەرمەندەرىڭىز كىم؟
− TNS اگەنتتىگىنىڭ مالىمەتىنشە، قازىرگى ۋاقىتتا اۋديتوريامىزدا 55+ جاستاعى بۋىن باسىم. سونىمەن قاتار، 6 دان 17 جاسقا دەيىنگى جاس ۇرپاق تا ءبىزدىڭ ارنانى تاماشالايدى. جانە مۇندا وزىمىزگە تەك ارتىقشىلىقتاردى تاپتىق. شىنىندا دا، سيفرلىق جانە اقپاراتتىق تەحنولوگيالار دامىعان، جاستار ءداستۇرلى ب ا ق- تان الىستاپ بارا جاتقان داۋىردە ولاردىڭ نازارىن اۋدارۋ وڭاي ەمەس. جالپى، ءبىز وتباسىلىق تەلەارنامىز. سوندىقتان كىشكەنتاي كورەرمەننەن باستاپ، ءبارىنىڭ قىزىعۋشىلىعىن ەسكەرەمىز. بۇل رەتتە ءبىز بارىنشا ءموبيلدى جۇمىس ىستەۋگە تىرىستىق. مىسالى، كورەرمەندەر ءبىر ۋاقىتتا وزدەرىنىڭ سۇيىكتى تەلەحيكاياسىن نەمەسە فيلمدەرىن كورە الادى جانە ەلدەگى ماڭىزدى وقيعالاردان حاباردار بولادى. باسقاشا ايتقاندا، ءبىزدىڭ كونتەنت تەك ەفيرمەن شەكتەلمەيدى، كەز كەلگەن ۋاقىتتا جانە بارلىق جەردە قولجەتىمدى.
− ەفيردىڭ بەت- بەينەسى تەلەجۇرگىزۋشىلەر ەكەنى بەلگىلى. ال ولاردىڭ ارتىندا كىم تۇر؟
− ءبىزدىڭ تۇتاس كوماندامىز تۇر. ەكراندا جارقىرايتىندار دا، كادر سىرتىندا جۇمىس ىستەيتىندەر دە - ءارقايسىسى ءوزىنىڭ ەلەۋلى ۇلەسىن قوسادى. ءبىزدىڭ كوماندا ءالى جاس جانە ءبىر ورىندا تۇرمايمىز، ىزدەنەمىز، داميمىز، ۇزدىك بولۋعا ۇمتىلامىز. تاجىريبەلى اعا قىزمەتكەرلەر ىشكى تالىمگەرلىكتى بەلسەندى دامىتۋدا. ماقسۇت نارىكبايەۆ اتىنداعى كازگيۋۋ ۋنيۆەرسيتەتىمەن ىنتىماقتاستىق اياسىندا حالىقارالىق جۋرناليستيكا مەكتەبىندە دارىستەر وتكىزەمىز. ايتپاقشى، ءارقايسىمىزدا وسۋگە جانە ءوز الەۋەتىمىزدى تولىق ىسكە اسىرۋعا تولىققاندى مۇمكىندىك بار.
شىندىعىندا، ۋاقىت وزگەرەدى، اۋديتوريانىڭ قىزىعۋشىلىعى وزگەرەدى، ءبىز دە وزگەرەمىز. ءبىر عانا نارسە وزگەرىسسىز قالادى - كورەرمەنگە ءاردايىم قىزىقتى بولۋ.
اۆتور
ەلميرا ورالبايەۆا
