وزەن-كولدە، كانالدا، فونتاندا بالا ءولىمى جيىلەدى - ۇكىمەت شارا قولدانۋدى تاپسىردى
استانا. KAZINFORM - سۋعا شومىلۋ ماۋسىمى باستالعالى كامەلەتكە تولماعان 20 بالا سۋدا قازا تاپتى. ق ر پرەمەر-ءمينيسترى ولجاس بەكتەنوۆ شومىلۋ ماۋسىمىندا بالالاردىڭ قاۋىپسىزدىگىنە باسا ءمان بەرۋدى تاپسىردى.
«جىل وتكەن سايىن رەسپۋبليكانىڭ سۋ ايدىندارىندا سۋعا كەتكەن ادامدار سانى ازايماي تۇر. بۇل شامامەن 200-300 ادام. ولاردىڭ ىشىندە جۇزگە جۋىق بالا بار. وكىنىشكە وراي، بيىل دا بۇل كورسەتكىش تومەندەمەي تۇر. جاز مەزگىلى ەندى باستالدى. سۋ ايدىندارىندا قايتىس بولعان ادامدار، اسىرەسە بالالار سانى وسۋدە»، - دەدى و. بەكتەنوۆ بۇگىنگى ۇكىمەت وتىرىسىندا.
ماسەلەن، سۋعا شومىلۋ ماۋسىمى باستالعالى كامەلەتكە تولماعان 20 بالا سۋدا قازا تاپتى. وتكەن اپتانىڭ وزىندە ەلوردادا وزەندى ءجۇزىپ وتەمىن دەگەن جاس ءوسپىرىم قازا تاپتى.
قىزىلوردادا بالالاردى قورعاۋ كۇنىندە بىردەن ەكى بالا سۋعا كەتكەن. تۇركىستان وبلىسىندا سۋارۋ كانالىندا ەكى بالا كوز جۇمدى. كاسپيي تەڭىزىندە قاراۋسىز قالعان ەكى جاسار بالا سۋعا باتىپ كەتتى.
«مۇنداي فاكتىلەر كۇن سايىن تىركەلىپ جاتىر. ءتىپتى توتەنشە جاعدايلار مينيسترلىگىنىڭ بۇگىنگى اقپارىندا دا سۋعا باتىپ كەتكەندەر بار. وڭىرلەردىڭ اكىمدىكتەرى وسى باعىتتاعى پروفيلاكتيكالىق جۇمىستى كۇشەيتكەنى ءجون. جۇرەتىن پاترۋل سانىن كوبەيتۋ قاجەت. پوليتسيا تجم بالالاردىڭ سۋ ايدىنى ماڭىندا قاراۋسىز ءجۇرۋ فاكتىلەرىنىڭ جولىن كەسۋى كەرەك»، - دەدى ۇكىمەت باسشىسى.
نەگىزىنەن ادامدار سۋعا تۇسۋگە ارنالماعان ۋچاسكەلەردە سۋعا كەتىپ جاتادى. قازىرگى ۋاقىتتا ەل بويىنشا سۋعا تۇسۋگە ارنالعان 708 ورىن بەلگىلەنگەن.
بۇل جۇمىس الماتى، اقمولا، قاراعاندى وبلىستارىندا بەلسەندى ءجۇرىپ جاتىر.
سونداي-اق، دەمالىس ورىندارى 10 نان اسپايتىن قىزىلوردا، جەتىسۋ، اباي جانە ۇلىتاۋ وبلىستارىندا وسى باعىتتاعى جۇمىستى جانداندىرۋ قاجەت. بۇل جۇمىستى باتىس جانە سولتۇستىك وڭىرلەردىڭ اكىمدىكتەرى دە بەلسەندى جۇرگىزۋ كەرەك.
«بيىل قازگيدرومەت، اسىرەسە ەلدىڭ باتىسىندا، شىعىسىندا جانە وڭتۇستىگىندە جازدىڭ ىستىق بولاتىنىن بولجاپ وتىر. وسىعان وراي، وزەندەر مەن كولدەردە دەمالۋشىلار سانى ارتادى دەپ كۇتىلۋدە. بۇعان دايىن بولۋ كەرەك. ت ج م جەرگىلىكتى اتقارۋشى ورگاندارمەن بىرلەسىپ موبيلدىك بەكەتتەر سانىن ۇلعايتۋى قاجەت»، - دەدى پرەمەر.
سۋ ايدىندارىننىڭ ماڭىندا ورنالاسقان بالالار لاگەرلەرىنە ەرەكشە نازار اۋدارۋ كەرەك. وقۋ-اعارتۋ مينيسترلىگى اكىمدىكتەرمەن بىرلەسىپ بالالاردىڭ جازعى كەزەڭدەگى قاۋىپسىز دەمالىسىن قامتاماسىز ەتۋ جونىندە شارالار قابىلداۋى كەرەك.
ەكىنشىدەن، وڭتۇستىك ايماقتارداعى سۋارۋ كانالدارى دا ادامدارعا قاۋىپ توندىرەدى. كانالاردار مەن ارىقتاردىڭ كوپشىلىگىندە قورشاۋ جوق.
«اسىرەسە، بالالاردىڭ كانالداردا قازا بولۋ جاعدايلارى الماتى، جامبىل، قىزىلوردا جانە تۇركىستان وبلىستارىندا كوپ تىركەلىپ وتىر. وسىعان بايلانىستى اكىمدىكتەر كانالدار مەن ارىقتاردا قاۋىپسىزدىكتى قامتاماسىز ەتۋ ماسەلەسىن شەشۋ ءتيىس. وتكەن جىلى پاۆلودار وبلىسىندا سۋبۇرقاقتا شومىلىپ جۇرگەن بالانى ەلەكتر توگى سوقتى. ارينە، سۋبۇرقاقتا شومىلۋعا تىيىم سالىنعان. بۇل تۋرالى سانيتاريالىق دارىگەرلەر ۇنەمى ەسكەرتىپ كەلەدى. بۇعان قاراماستان، بالالار سۋبۇرقاققا شومىلۋعا بارادى. مۇنى استانادا، الماتىدا، باسقا قالالاردا دا بايقاۋعا بولادى. بارلىق اكىمدىكتەر سۋبۇرقاقتاردىڭ ءقاۋىپسىز جۇمىسىن تەكسەرىپ، سونداي-اق باقىلاۋدى كۇشەيتىپ، بالالاردىڭ شومىلۋىنا جول بەرمەۋى ءتيىس»، - دەدى ولجاس بەكتەنوۆ.
