وزگەلەرمەن بىرگە وتىر - ىشكى ىستەر ءمينيسترى تۇرمەدەگى بيشىمبايەۆ جايىندا

استانا. KAZINORM - ايەلىن ءولتىردى دەگەن كۇدىكپەن ۇستالعان بۇرىنعى ۇلتتىق ەكونوميكا ءمينيسترى قۋاندىق بيشىمبايەۆ وزگە دە تۇتقىندارمەن بىرگە وتىر. بۇل تۋرالى ىشكى ىستەر ءمينيسترى ەرجان سادەنوۆ ايتتى.

«ءىس اياقتالدى. قازىر ماتەريالدارمەن تانىسۋ ءجۇرىپ جاتىر. سودان كەيىن سوتقا جىبەرىلەدى. ونىڭ پروتسەسى مىناداي: زارداپ شەگۋشى دە، كۇدىكتى  تاراپ تا تانىسادى. مەنىڭشە، پروتسەسس اياقتالىپ قالدى. تەرگەۋ تولىعىمەن اياقتالدى. ىسپەن تانىسىپ بولعاننان كەيىن پروكۋراتۋراعا جىبەرەمىز»، - دەدى مينيستر ءماجىلىستىڭ جالپى وتىرىسىنان كەيىن ب ا ق وكىلدەرىنىڭ ساۋالىنا وراي.

سونىمەن قاتار ول تۇرمەدە وتىرعان قۋاندىق بيشىمبايەۆتىڭ جاعدايى جاسقى ەكەندىگىن ايتتى.

«بارلىعىنا بىردەي جاعداي جاسالعان. ول تۇتقىنعا الىندى. سوندىقتان جالپى نەگىزدە، وزگەلەرمەن بىرگە وتىر. دەنساۋلىعىندا ءبارى دۇرىس»، - دەدى ەرلان سادەنوۆ.

ەسكە سالايىق، بىلتىر 9- قاراشادا استاناداعى باۋ مەيرامحاناسىندا بۇرىنعى ۇلتتىق ەكونوميكا ءمينيسترى قۋاندىق بيشىمبايەۆ ءوزىنىڭ جۇبايىن سوققىعا جىقتى. ايەل جەدەل جاردەم كەلگەنشە كوز جۇمدى.

كەيىن ىشكى ىستەر مينيسترلىگى قۋاندىق بيشىمبايەۆتىڭ ۇستالعانىن راستادى.

15- قاراشادا وتكەن كەڭەستە پرەزيدەنت ق. توقايەۆ ءىءىى م- گە بيشىمبايەۆتىڭ ءىسىن ەرەكشە باقىلاۋعا الۋدى تاپسىردى.