وزبەكستاننىڭ ءۇش ۋنيۆەرسيتەتى الەمدىك رەيتينگىگە ەندى
QS Sustainability Rankings - 2024 الەمدەگى ۇزدىك ۋنيۆەرسيتەتتەر رەيتينگىنە ءۇش وزبەكستاندىق جوعارى وقۋ ورنى ەندى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.
جالپى رەيتينگىگە 95 ەلدىڭ 1397 وقۋ ورنى كىرگەن. ونىڭ اراسىندا قورشاعان ورتانى قورعاۋ سالاسىنداعى باسقارۋ جۇيەسىن ۇيىمداستىرۋ جانە ورنىقتى دامۋ ماقساتتارىن ورىنداۋدا جوعارى ناتيجە كورسەتكەن وزبەكستاننىڭ ءۇش ۋنيۆەرسيتەتى بار.
اتاپ ايتقاندا، تاشكەنت يرريگاتسيا جانە اۋىل شارۋاشىلىعىن مەحانيكالاندىرۋ ينجەنەرلەرى ينستيتۋتى 701-ورىنعا جايعاستى.
ي. كاريموۆ اتىنداعى تاشكەنت مەملەكەتتىك تەحنيكالىق ۋنيۆەرسيتەتى 1101-ورىنعا تۇراقتاسا، ميرزو ۇلىقبەك اتىنداعى وزبەكستان ۇلتتىق ۋنيۆەرسيتەتى 1201-ورىندا.
رەيتينگىنىڭ كوشىن تورونتو ۋنيۆەرسيتەتى باستاپ تۇر. ەكىنشى ورىندا - بەركليدەگى كاليفورنيا ۋنيۆەرسيتەتى، ۇزدىك ۇشتىكتى مانچەستەر ۋنيۆەرسيتەتى تۇيىندەپ تۇر.
توقتالا كەتسەك، ۇزدىك وقۋ ورىندارىنىڭ تىزىمىنە ا ق ش- تىڭ – 209، ۇلى بريتانيانىڭ - 93 جانە قىتايدىڭ 90 ۋنيۆەرسيتەتى ەنگەن.
ەسكە سالايىق، بۇعان دەيىن اتالعان رەيتينگىگە قازاقستاننىڭ 12 جوعارى وقۋ ورنى كىرگەنىن جازىپ ەدىك.
