وزبەكستاننىڭ ءۇش مادەني مۇراسى يۋنەسكو تىزىمىنە ەنگىزىلدى
يۋنەسكو ۇكىمەتارالىق كوميتەتىنىڭ 18- سەسسياسىندا وزبەكستاننان ءۇش نوميناتسيا ادامزاتتىڭ ماتەريالدىق ەمەس مادەني مۇراسىنىڭ رەپرەزەنتاتيۆتى تىزىمىنە ەنگىزىلدى، دەپ حابارلايدى Kazinform.
وزبەكستاننىڭ مادەنيەت جانە ونەردى دامىتۋ قورى ۇسىنعان اقپاراتقا ساي، «وزبەكستاننىڭ كەراميكا ونەرى» نوميناتسياسى كوميسسيا مۇشەلەرىنىڭ جوعارى باعاسىنا يە بولعان. بۇل - قولونەردىڭ تەرەڭ تاريحىن، كەراميكا سالاسىنداعى ءىلىمنىڭ ۇرپاقتان ۇرپاققا جالعاسۋىن جانە جاستاردىڭ ونى ساقتاۋعا بەلسەندى قاتىسقانىن ايعاقتايدى.
«كەراميكا - وزبەكستانداعى ەڭ كونە جانە ەرەكشە حالىق ونەرىنىڭ ءبىرى سانالادى. كەراميكانىڭ ريشتان، بۇحارا، گۋرۋمساراي، تاشكەنت، حورەزم، سامارقاند جانە قاشقاداريا سياقتى قىش مەكتەپتەرى نەگىزگى ورتالىقتار بولىپ قالىپتاسقان. ولار ءبىر- بىرىنەن بۇيىمداردى جاساۋ تاسىلىمەن، ورنەكتەرىمەن، تۇستەرىمەن جانە پىشىندەرىمەن ەرەكشەلەنەدى»، - دەپ ءمالىم ەتتى اتالعان قور.
ازەربايجان، تاجىكستان، تۇركيا جانە يرانمەن بىرلەسىپ ەنگىزىلگەن تاعى ەكى نوميناتسيا - «يلليۋميناتسيا ونەرى: ناككوشليك» جانە «يفتار جانە ونىڭ الەۋمەتتىك- مادەني داستۇرلەرى» .
«جاڭا نوميناتسيالاردىڭ ارقاسىندا يۋنەسكو- نىڭ قورعاۋىنداعى ماتەريالدىق ەمەس مۇرالار قاتارىنا وزبەكستان ۇسىنعان ەلەمەنتتەر سانى 15 كە جەتتى. بۇل ولاردىڭ وركەنيەت ءۇشىن ماڭىزدىلىعىن كورسەتىپ تۇر. ول ءوز كەزەگىندە حالىقارالىق دەڭگەيدە باي مادەني مۇرانى ىلگەرىلەتۋ مەن قورعاۋداعى ماڭىزدى قادام»، - دەلىنگەن قوردان ۇسىنىلعان حابارلامادا.
