وزبەكستاندىق شەنەۋنىكتەرگە ۇلتتىق كيىم كيۋ ۇسىنىلدى

تاشكەنت. KAZINFORM — اپتانىڭ ءار جۇماسى تاشكەنتتەگى مەملەكەتتىك مەكەمەلەردە ۇلتتىق كيىم كۇنى بولىپ بەكىتىلدى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.

Өзбекстандық шенеуліктерге ұлттық киім кию ұсынылды
Фото: Өзбекстанның Көлік министрлігі

«ۇلتتىق تاشكەنت» جوباسىن جۇزەگە اسىرۋعا باعىتتالعان قاۋلىعا وزبەكستان استاناسىنىڭ حوكيمى شاۆكات ۋمۋرزاكوۆ قول قويدى. اتالعان باعدارلامانى ىسكە اسىرۋ ءۇشىن ارنايى جۇمىس توبى قۇرىلادى.

قۇجاتقا ساي، تاشكەنتتە ۇيىمداستىرىلاتىن بارلىق بۇقارالىق ءىس-شارا ۇلتتىق ناقىشتا بەزەندىرىلەدى جانە ونىڭ قاتىسۋشىلارى وزبەك حالقىنىڭ ءداستۇرلى كيىمىن كيەدى.

سونىمەن قاتار، جوبا اياسىندا قالا مەن اۋداندارداعى مەملەكەتتىك مەكەمەلەردىڭ قىزمەتكەرلەرىنە تەك جۇما كۇنى ەمەس، كۇندەلىكتى نەگىزدە ۇلتتىق كيىم كيۋ ۇسىنىلادى.

بۇعان قوسا، قوعامدىق كولىك، ۆاگون مەن مەترو ستانتسيالارى ۇلتتىق ناقىشتاعى ەلەمەنتتەرمەن بەزەندىرىلەدى.

ەسكە سالايىق، وزبەكستان باسشىسى مەملەكەتتىك ورگاندارعا قىزمەتتىك شىعىنداردى قىسقارتۋدى تاپسىردى.

بۇعان دەيىن حابارلاعانىمىزداي، وزبەكستاندا جەمقورلىققا بەيىم كەلەتىن شەنەۋنىكتەردى ەرتە انىقتاۋ تاجىريبەسى ەنگىزىلمەك.

سوڭعى جاڭالىقتار