وزبەكستانداعى قىلمىستىق توپتاردى قۇرىقتاۋ شاراسى: تاعى 6 كۇدىكتى ۇستالدى

  40 كۇندىك جەدەل- پروفيلاكتيكالىق ءىس- شارا اياسىندا تاشكەنت قالالىق ىشكى ىستەر باسقارماسى وزگە دە ورگاندارمەن بىرلەسىپ، قىلمىس جاسادى دەپ كۇدىككە ىلىنگەن تاعى 6 ادامدى ۇستادى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.

ۆەدومستۆودان مالىمدەگەندەي، ۇستالعانداردىڭ اراسىندا جەلتوقساننىڭ باسىندا قاماۋعا الىنعان قىلمىس الەمىندە “باحتي تاشكەنتتىك" جانە "باحتي يانگياباد" دەگەن اتپەن بەلگىلى 52 جاستاعى باحتيەر قۋدراتۋللايەۆتىڭ ۇلى، 27 جاستاعى يحتيەر قۋدراتۋللايەۆ تا بار.

ونىڭ ۇستىنەن وزبەكستان قىلمىستىق كودەكسىنىڭ 156-بابى 3-بولىگى بويىنشا (اسا ءىرى كولەمدە بوپسالاۋ) ءىس قوزعالدى.

ايتا كەتەيىك، ونىڭ اكەسىنە قاتىستى ءىس تە وسىعان ۇقساس باپ بويىنشا اشىلعان. سونداي- اق باحتيەر قۋدراتۋللايەۆ 276-باپتىڭ 2-بولىگى نەگىزىندە ء(ارى قاراي وتكىزۋ ماقساتىنسىز ءىرى مولشەردە ەسىرتكى نەمەسە پسيحوتروپتىق زاتتاردى زاڭسىز دايىنداۋ، ساتىپ الۋ، ساقتاۋ) تەرگەلىپ جاتىر.

تاشكەنت قالالىق ءىىب اتالعان قىلمىستىق ىستەردى تەرگەۋ جالعاسىپ جاتقانىن ءمالىم ەتتى.

ەسكە سالايىق، بۇعان دەيىن وزبەكستاندا 120 دان استام ۇيىمداسقان قىلمىستىق توپ مۇشەلەرى ۇستالعانىن جازىپ ەدىك.

سونىمەن قاتار، وزبەكستان پرەزيدەنتى شاۆكات ميرزيەيەۆ رۋحانيات جانە اعارتۋ ماسەلەلەرى جونىندەگى رەسپۋبليكالىق كەڭەستە قىلمىس الەمىنىڭ سەركەلەرىن ۇستاۋ شاراسىنا قاتىستى پىكىر بىلدىرگەن بولاتىن.