وزبەكستانداعى قازاقتار ناۋرىزدى قالاي اتاپ وتەدى
تاشكەنت. KAZINFORM - بيىل ناۋرىز مەيرامىنىڭ دۇنيەجۇزىلىك ماتەريالدىق ەمەس مۇرالار تىزىمىنە ەنگەنىنە - 15 جىل. بۇگىندە الەمنىڭ 30 دان استام ەلى بۇل كۇندى كەڭ اۋقىمدا اتاپ وتەدى. كەيىنگى كەزدەرى ول ەل ىشىندە يگى ۇردىستەردى قالىپتاستىراتىن كۇشكە اينالىپ كەلەدى. بۇل رەتتە وزبەكستانداعى قازاقتار دا ۇلىق مەيرامدى ەرەكشە ەكشەپ، جوعارى دەڭگەيدە مەرەكەلەيدى، دەپ حابارلايدى Kazinform اگەنتتىگىنىڭ تاشكەنتتەگى مەنشىكتى ءتىلشىسى ءاليحان اسقار.
قاراقالپاقستانداعى قازاقتار ءۇشىن ناۋرىز - كوپ مەرەكەنىڭ ءبىرى ەمەس. مۇندا بۇل مەيرامنىڭ ماڭىزى مەن ونىڭ بارشا ادامزاتتى يگىلىككە باستايتىن قۇندىلىعىنا اسا ءمان بەرىلەدى. اتالعان مەرەكە تەك ءبىر كۇن تويلانبايدى. ول كورىسۋ كۇنىنەن باستالىپ، ايدىن سوڭىنا دەيىن جالعاسادى. وسى ارالىقتا بارلىعى ۇلتتىق كيىمدەرىمىزدى كيىپ، جارىسا جاقسى ءىس جاساۋعا جۇمىلادى.
سونىمەن قاتار، قاراقالپاق جەرىندەگى قانداستار شالعايداعى اعايىنعا ارناپ داستارحان جايىپ، سپورتتىق سايىستار مەن كونسەرتتىك باعدارلامالار ۇيىمداستىرادى.
«ۇمىت قالىپ بارا جاتقان ءداستۇرىمىزدى قايتا جاڭعىرتۋ، ونى ارتىمىزدان ەرگەن بۋىنعان ۇيرەتۋ ماقساتىندا وسىلاي كەڭ كولەمدە اتاپ وتەمىز. ناۋرىزدى امال مەرەكەسىنەن باستايمىز جانە ءبىر-بىرىمىزگە ىزگى تىلەك- نيەتىمىزدى ايتىپ، جىلى لەبىزىمىزدى بىلدىرەمىز. بۇل بارشا ادامزاتتى يگىلىك پەن ىزگىلىككە جەتەلەيتىن مەيرام دەپ سانايمىز. سوندىقتان وسى مەرەكە ورتاق سانالاتىن بارشا باۋىرلاس حالىقتاردى قۇتتىقتايمىن!» - دەپ تىلەك ءبىلدىردى قاراقالپاقستانداعى قازاق مادەني ورتالىعىنىڭ مۇشەسى قارۋ قايمولدايەۆ.
ناۋرىز تەك جەكەلەگەن وڭىرلەرگە عانا ەمەس، وزبەكستاننىڭ ءار ايماعىندا اسا جوعارى ماڭىز بەرىلە وتىرىپ مەرەكەلەنەدى. ونىڭ ىشىندە قازاقتار كوپ قونىستانعان وبلىستاردىڭ ءبىرى ناۋايدە دە ەرەكشە اتالىپ وتەدى. مۇنداعى جۇرت ءبىر- بىرىمەن تاتۋ، ۇلت پەن ۇلىسقا بولىنبەيدى. قازاق، وزبەك، قاراقالپاق بولىپ، كۇن مەن ءتۇننىڭ تەڭەلىپ، جەر- انانىڭ بۋسانعان شاعىندا ءوڭىردى مەرەكەگە بولەيدى.
«انسامبلىمىز قازاقستاننان، كورشى ەلدەردەن كەلەتىن قوناقتارعا قىزمەت جاساپ كەلەدى. ءوزىمىز ۇلتتىق داستۇرلەرىمىزدى كورسەتىپ، كوبىنە وسى اتا-بابامىزدىڭ حالىق اندەرىن ورىندايمىز. اسىرەسە، ناۋرىز مەرەكەسىندە مۇندا كونتسەرتتىك شارالار ۇيىمداستىرىلىپ، حالىققا كوتەرىڭكى كوڭىل- كۇي سىيلاۋعا تىرىسامىز. جالپى، ءوزىمىز تۇرىپ جاتقان وڭىردە ۇلتتىق داستۇرلەرىمىز بەن قۇندىلىقتارىمىزدى قاتاڭ ساقتايمىز جانە ونى كەلەر بۋىنعا ناسيحاتتاپ كەلەمىز»، - دەدى كەنيمەح اۋداندىق مادەنيەت ءۇيىنىڭ قىزمەتكەرى مۇقاعالي مارالوۆ.
بۇل رەتتە تاشكەنت قازاقتارى دا بىرەگەيلىگىن ساقتاپ كەلەدى. اسىرەسە، ۇلتتىق كيىم كيىپ، مۋزىكالىق اسپاپتارىن الىپ، مەرەكەلىك كوڭىل-كۇيمەن ورتالىق الاڭعا بەتتەيتىن جاستار كوپ. سول ارقىلى ءتول مادەنيەتىن دارىپتەپ، «جىل جەمىستى بولسىن» دەگەن تىلەكپەن كوپشىلىككە ءان ايتىپ، ونەرلەرىن پاش ەتەدى.
ايتا كەتەيىك، قازاقستان مەن وزبەكستان اۋەل باستان وسى ۇلىق مەيرامدى يۋنەسكو-نىڭ ماتەريالدىق ەمەس مۇرالار تىزىمىنە ەنگىزۋ ءۇشىن كوپ كۇش جۇمسادى. بۇل رەتتە بىرلەسە ارەكەت ەتتى. قازىر ناۋرىز بۇكىل الەمگە حالىقارالىق جاڭارۋ كۇنى رەتىندە تانىلعان. ال، جەر-جەردە ۇيىمداستىرىلاتىن مادەني شارالار باۋىرلاس ەلدەردى جاقسىلىققا ۇندەپ، يگى ىستەرگە ۇيىستىراتىن ەرەكشە كۇشكە اينالعانداي.
اۆتور
ءاليحان اسقار
