وزبەكستاندا پوليتسەيدى سوققىعا جىعىپ، كولىگىنىڭ تەرەزەلەرىن سىندىرعاندار قاماۋعا الىندى

سامارقاند قالاسىنداعى جانجال تۋرالى قوڭىراۋعا جاۋاپ رەتىندە پاتەرگە بارعان پروفيلاكتيكالىق ينسپەكتوردى ءۇي يەلەرى ۇرىپ-سوققان دەپ حابارلايدى Kaziform اگەنتتىگى Gazeta.uz سايتىنا سىلتەمە جاساپ.

سونداي-اق پروفيلاكتيكالىق ينسپەكتورعا تيەسىلى كولىكتىڭ تەرەزەلەرى سىنعان. قىلمىستىق ءىس قوزعالىپ، 2 ازامات قاماۋعا الىندى.

سول كۇنى ساعات 19:30-دا قالانىڭ بۋنەد كەنتىندە تۇراتىن ازامات م. ر. 102 وپەراتورىنا حابارلاسىپ، پاتەردەگى توبەلەس تۋرالى حابارلاپ، ينسپەكتوردى جىبەرۋدى سۇراعان.

وسىعان سايكەس پروفيلاكتيكالىق ينسپەكتور ا. ت. شاقىرتۋ تۇسكەن مەكەنجايعا بارعان.

«ول جەردە ينسپەكتور قىلمىستىق كودەكستىڭ بىرنەشە بابى بويىنشا سوتتالعان ازاماتتار م. ر. ، ونىڭ اپكەسى، كۇيەۋى جانە اعاسى ءوزارا جانجالداسىپ جاتقانىن كورىپ، ولاردى اجىراتىپ، جانجالدى توقتاتۋعا ارەكەتتەنگەن. الايدا، ازاماتتار پروفيلاكتيكالىق ينسپەكتورعا بەلسەندى تۇردە قارسىلىق كورسەتىپ، ونى ۇرىپ-سوعىپ، دەنەسىن جاراقاتتاعان. سونداي-اق ينسپەكتورعا تيەسىلى Spark اۆتوكولىگىنىڭ الدىڭعى تەرەزەسىن سىندىرىپ، ماتەريالدىق شىعىن كەلتىرگەن»، - دەلىنگەن ءى ءى ب حابارلاماسىندا.

اتالعان ازاماتتارعا قاتىستى قىلمىستىق كودەكستىڭ 219-بابىنىڭ 2-بولىگى (بيلىك وكىلىنە نەمەسە ونىڭ ازاماتتىق بورىشىن وتەپ جۇرگەن ادامعا قارسىلىق كورسەتۋ) بويىنشا قىلمىستىق ءىس قوزعالدى.

ىشكى ىستەر مينيسترلىگىنىڭ مالىمەتىنشە، ازاماتتاردىڭ ءبىرى پروتسەسسۋالدىق تارتىپتە ۇستالدى، تاعى ءبىر ازامات ءۇيقاماققا الىندى. تەرگەۋ امالدارى جۇرگىزىلۋدە.

جوعارىدا اتالعان باپ بويىنشا كىنالى دەپ تانىلعان ادامدار 3 جىلدان 5 جىلعا دەيىن باس بوستاندىعىنان ايىرىلۋى مۇمكىن.

اۆتور

جاراسقان نۇرىبايەۆ