وزبەكستاندا قازاقستاندىق ونىمدەر پاۆيلونى اشىلدى

استانا. قازاقپارات - قازاقستان، وزبەكستان جانە اۋعانستان اراسىنداعى ساۋدا بايلانىستارىن نىعايتۋ ماقساتىندا وزبەكستان رەسپۋبليكاسىنداعى «ايريتوم» ا ە ا اۋماعىندا ورنالاسقان «تەرمەز» حالىقارالىق ساۋدا ورتالىعىندا قازاقستاندىق ونىمدەر ۇسىنىلعان پاۆيلون اشىلدى، - دەپ حابارلايدى Aikyn.kz. 

ساۋدا جانە ينتەگراتسيا مينيسترلىگىنىڭ حابارلاۋىنشا، ءىس-شارا قازاقستان رەسپۋبليكاسىنىڭ ساۋدا جانە ينتەگراتسيا مينيسترلىگى مەن «QazTrade» ا ق قولداۋىمەن ءوتتى.

سالتاناتتى ءراسىم اياسىندا قازاقستاندىق تاراپ پەن «ايريتوم» ا ە ا ديرەكسياسى اراسىندا ساۋدا پاۆيلونىن جالعا الۋ تۋرالى كەلىسىمشارتقا قول قويىلدى. بۇل كەلىسىم قازاقستاندىق ونىمدەردىڭ سىرتقى نارىقتارداعى ۇلەسىن ارتتىرۋعا جانە ساۋدا-ساتتىقتى دامىتۋعا جاسالعان ماڭىزدى قادام بولدى.

«تەرمەز» حالىقارالىق ساۋدا ورتالىعى كاسىپكەرلەر ءۇشىن قولايلى ىسكەرلىك ورتانى قالىپتاستىرۋ، لوگيستيكانى جاقسارتۋ جانە اكىمشىلىك راسىمدەردى جەڭىلدەتۋ ءۇشىن قۇرىلعان. جاڭا پاۆيلون قازاقستاندىق تاۋارلاردى وزبەكستان مەن اۋعانستان نارىعىنا شىعارۋعا ارنالعان ماڭىزدى پلاتفورماعا اينالىپ، ەكىجاقتى ىنتىماقتاستىقتى دامىتۋعا جانە قازاقستاننىڭ ەكسپورتتىق مۇمكىندىكتەرىن كەڭەيتۋگە جول اشادى.

قازاقستاندىق كومپانيالار پاۆيلون بازاسىندا ءوزارا كەلىسىمدەر جاساپ، ىنتىماقتاستىق ورناتادى. مۇندا بيزنەستى كەڭەيتۋگە جانە كورشى ەلدەردىڭ نارىعىندا ونىمدەردى ىلگەرىلەتۋگە بارلىق جاعداي جاسالعان. وتاندىق وندىرۋشىلەر ءوز ونىمدەرىن پاۆيلونعا ورنالاستىرۋ ءۇشىن «QazTrade» ا ق-عا حابارلاسا الادى.