وزبەكستاندا قازاقستاندىق اقىن، كومپوزيتوردىڭ كىتابىنىڭ تۇساۋكەسەرى ءوتتى
تاشكەنت. KAZINFORM - وزبەكستان استاناسىندا اقىن، كومپوزيتور، قازاقستان جازۋشىلار وداعىنىڭ مۇشەسى تولەۋجان عۇماروۆتىڭ «التىن بەسىك» اتتى كىتابىنىڭ تۇساۋكەسەرى ءوتتى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.
تۇساۋكەسەر سالتاناتى نيزامي اتىنداعى وزبەكستان ۇلتتىق پەداگوگيكالىق ۋنيۆەرسيتەتىنىڭ عيماراتىندا ءوتتى. وعان وزبەكستانداعى قازاق قالامگەرلەرى، ستۋدەنتتەر مەن جەرگىلىكتى قازاقتار قاتىستى.
«التىن بەسىك» كىتابى قازاق- وزبەك تىلدەرىندە جارىق كورىپ وتىر. ءتۇپنۇسقانىڭ اۆتورى تولەۋجان عۇماروۆ بولسا، تۋىندىنى وزبەك تىلىنە روبيا دۋستانوۆا اۋدارعان.
- «التىن بەسىك» - مەنىڭ ءتورتىنشى كىتابىم. الماتى وبلىسى اكىمدىگىنىڭ قولداۋىمەن جىل سايىن شىعاتىن تۋىندىلار سەرياسى بار. سونىڭ نەگىزىندە مەنىڭ دە ەڭبەگىم جارىق كوردى. «التىن بەسىك» كىتابى بالاباقشا، مەكتەپ بالالارىنا ارنالعان تانىمدىق وقۋلىق. ق ر مادەنيەت جانە اقپارات مينيسترلىگىنىڭ قازاق- وزبەك قارىم-قاتىناسىن، ونىڭ ىشىندە ادەبي بايلانىستاردى نىعايتۋ باستاماسى بار. تيىسىنشە، كىتاپتى وزبەك تىلىنە اۋدارۋ اتالعان جوبا اياسىندا قولعا الىندى. وسى رەتتە اۋدارماشى روبيا دۋستانوۆاعا العىس بىلدىرەمىن، - دەدى كىتاپ اۆتورى تولەۋجان عۇماروۆ.
1000 تيراجبەن باسىلىپ شىققان كىتاپتا قازاقتىڭ سالت-ءداستۇرى، ىرىمدارى مەن تىيىم سوزدەرى قامتىلعان. ەڭبەك بالانىڭ ساناسىنا قونىمدى تىلمەن، ياعني تەز جاتتالاتىن قىسقا ولەڭ شۋماقتارىمەن جازىلعان.
- بيىل جارىق كورگەن «التىن بەسىك» تۋىندىسىن قازاق حالقىنىڭ سالت- ءداستۇرىن، تۇرمىس-تىرشىلىگىن پوەزيا تىلىمەن تانىستىراتىن تاربيەلىك ءمانى جوعارى جىر جيناق رەتىندە باعالاۋعا بولادى. جيناقتاعى ولەڭدەر بالا تىلىنە جاتىق ءارى كوركەم ستيلدە جازىلعان. ونداعى ولەڭدەر ارقىلى جاس ۇرپاق اتا-بابا جولىن تانىپ، ۇلتتىق تاربيە مەن بىلىمگە بەت الادى. مۇنداي ەڭبەكتەردى جارىققا شىعارۋ - قازاقستان مەن وزبەكستان اراسىنداعى مادەني، ادەبي بايلانىستارىنىڭ نىعايىپ كەلە جاتقانىن ايعاقتايدى، - دەپ توقتالدى وزبەكستان جازۋشىلار وداعىنا قاراستى قازاق ادەبيەتى كەڭەسىنىڭ ءتوراعاسى ءتۇرسىنالى احمەتوۆ.
ەسكە سالايىق، بىلتىر وزبەكستانداعى قازاق قالامگەرلەرىنىڭ 20 عا جۋىق كىتابى جارىققا شىقتى. ونىڭ ىشىندە ابدۋللا رۇستەموۆتىڭ «قايران دۇنيە» ، ساپاربەك يمانبەكوۆتىڭ «دوستارىمىز جىرلايدى»، جاراسقان مىرزامۇراتوۆتىڭ «اقيقاتتىڭ ءدامى اشى» جانە لولا ءجۇنىس قىزىنىڭ «قاراسۋ جىرلارى» اتتى ەڭبەكتەرى بار.
قوسا كەتسەك، بۇعان دەيىن قازاقستان مەن وزبەكستان مادەني بايلانىستاردى نىعايتۋعا مۇددەلى ەكەنىن جازىپ ەدىك.
اۆتور
ءاليحان اسقار
