وزبەكستاندا جىنىستىق سيپاتتاعى قىلمىستار ءۇشىن ءۇش ايدا 318 ادام جازا ارقالادى

تاشكەنت. KAZINFORM - بيىلعى ءۇش ايدىڭ ىشىندە وزبەكستاندا جىنىستىق سيپاتتاعى قىلمىستار ءۇشىن 318 ادام جاۋاپقا تارتىلدى، دەپ حابارلايدى Kazinform اگەنتتىگىنىڭ تاشكەنتتەگى مەنشىكتى ءتىلشىسى ءاليحان اسقار.

«ءو ر قىلمىستىق كودەكسىنىڭ 41-1-بابى بويىنشا (جىنىستىق قول سۇعۋشىلىق) 318 ادام اكىمشىلىك جاۋاپكەرشىلىككە تارتىلدى. ولاردىڭ ىشىندە 97 ادامعا ايىپپۇل سالىنسا، 221 ى اكىمشىلىك قاماۋعا الىندى»، - دەپ ءمالىم ەتتى وزبەكستان جوعارى سوتىنىڭ باسپا ءسوز حاتشىسى ازيز ابيدوۆ.

ۆەدومستۆونىڭ دەرەگىنە ساي، قىلمىستىق كودەكستىڭ 141-3-بابى (ادامنىڭ ار-نامىسى مەن قادىر-قاسيەتىنە نۇقسان كەلتىرەتىن جانە جەكە باسقا قاتىستى مالىمەتتەردى جاريا ەتۋ) بويىنشا 40 ادام قىلمىستىق جاۋاپقا تارتىلعان. اتاپ ايتقاندا، 13 ادام باس بوستاندىعىنان ايىرىلدى، ال 27 تۇرعىنعا وزگە جازالار تاعايىندالدى.

ەسكە سالايىق، بىلتىر وزبەكستاندا جىنىستىق قول سۇعۋشىلىق قىلمىستارىنا قاتىسى بار 666 ادامعا ءتۇرلى جازا كەسىلگەن بولاتىن.

سونداي-اق، ۇستىمىزدەگى جىلدىڭ العاشقى توقسانىندا وزبەكستاندا تۇرمىستىق زورلىق-زومبىلىق ارەكەتتەرىن جاساعان 4477 ادام اكىمشىلىك جانە قىلمىستىق جاۋاپكەرشىلىككە تارتىلدى.

اۆتور
ءاليحان اسقار