وزبەكستاندا جابايى جانۋار اسىرايتىندارعا قاتىستى جازا ەنگىزىلدى

تاشكەنت. KAZINFORM - وزبەكستان پرەزيدەنتى شاۆكات ميرزيەيەۆ ءتيىستى زاڭعا قول قويدى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.

жерсіндіру
Фото: Экология және табиғи ресурстар министрлігі

سونىمەن، وزبەكستاننىڭ اكىمشىلىك جاۋاپكەرشىلىك تۋرالى كودەكسى جاڭا باپپەن تولىقتى. وزگەرىسكە ساي، جەكە تۇلعالاردىڭ جابايى جانۋاردى ءوزىنىڭ تىرشىلىك ەتۋ ورتاسىنان تىس جەردە قاماپ ۇستاۋىنا نەمەسە اسىراۋىنا جول بەرىلمەيدى. بۇل تالاپتى ەلەمەگەندەر 5-10 بازالىق ەسەپتىك شاما (90 دوللاردان 290 دوللارعا دەيىن) كولەمىندە ايىپپۇل ارقالايدى.

ەگەر زاڭسىز ۇستاپ وتىرعان جابايى جانۋار وزگەنىڭ دەنساۋلىعىنا نەمەسە مۇلكىنە زيان كەلتىرسە، وندا ايىپپۇل مولشەرى 50 بازالىق ەسەپتىك شاماعا (1440 دوللارعا) دەيىن ارتادى.

سونىمەن قاتار، قاڭعىباس جانۋارلاردى اۋلاۋ مىندەتىن ورىنداماعان جاۋاپتى شەنەۋلىكتەرگە دە جازا قولدانىلادى. جۇمىسىنا نەمقۇرايلى قاراپ، سالدارىنان ادام دەنساۋلىعىنا نەمەسە مۇلكىنە زالال كەلسە، وندا لاۋازىمدى تۇلعالارعا 30 بازالىق ەسەپتىك شاما (870 دوللار) كولەمىندە ايىپپۇل سالىنادى.

ايتا كەتەيىك، تاياۋدا وزبەكستاندا حايۋاناتتار باعىنداعى توردان شىعىپ كەتكەن 3 ارىستان كۇزەتشىنى تالاپ ءولتىردى.

بۇعان دەيىن حابارلعانىمىزداي، بيىلدان باستاپ وزبەكستانداعى سيركتەردە جابايى جانۋارلاردى پايدالانۋعا تىيىم سالىنادى.

سوڭعى جاڭالىقتار