وزبەكستاندا جاڭا قازاق مەكتەبى پايدالانۋعا بەرىلدى

وزبەكستاننىڭ بوستاندىق اۋدانىنا قاراستى جاڭااۋىل ەلدى مەكەنىندە جاڭادان سالىنعان قازاق مەكتەبى پادالانۋعا بەرىلدى، دەپ حابارلايدى Kazinform.

جاڭا مەكتەپ بوي كوتەرگەن جەردە بۇعان دەيىن 1963-جىلى سالىنعان ءبىلىم ورداسى بولعان. ول سول كەزدە وسى اۋىلداعى قازاق تىلىندەگى ەڭ ۇلكەن مەكتەپ سانالعان. ال 2008-جىلى ونىڭ جانىنان ەكىنشى كەشەن سالىنىپ، ەكى بولىك تە ءبىر ءبىلىم ورداسىنا تيەسىلى بولدى. ال بيىل ەسكى مەكتەپ ءسۇرىلىپ، ونىڭ ورنىنا جاڭا عيمارات قۇرىلىپ وتىر.

«كەزىندە باسقا مەكتەپتەر 8 جىلدىق بولسا، بۇل مەكتەپ 10 جىلدىق بولعان. ول ۋاقىتتاردا مۇندا 8 سىنىپ ورنالاسقان، ەكى اۋىسىمدا تولىق وقىعان. جالپى سانى 500 بالا ءبىلىم الاتىن. ال 2008-جىلى مەملەكەتتىڭ قولداۋىمەن ەسكى مەكتەپتىڭ جانىنان 300 ورىندىق تاعى ءبىر ءبىلىم ورداسى قۇرىلىپ، ەكەۋى ءبىر مەكتەپ سانالدى. وندا ساباق بەرۋگە ارنالعان 10 سىنىپ بار. وسى مەكتەپتى سالۋ كەزىندە سپورتزالدىڭ قۇرىلىسى اياقتالماي قالدى. ءبىز ءبىراز جەرگە شاعىم تۇسىردىك، اۋىل ازاماتتارى ءبىرشاما جەرگە باردى. سونىڭ ناتيجەسىندە 1963-جىلى سالىنعان مەكتەپتىڭ ورنىنا 120 ءبىلىم الۋشىعا شاقتالعان مەكتەپ قۇرىلدى. ونىڭ ىشىندە 100 ادامعا ەسەپتەلگەن اكت زالى، زامان تالابىنا ساي 12x24 ولشەمىندەگى سپورتزال بار»، - دەدى مەكتەپ ديرەكتورى ءالياسقار قۇربانبايەۆ.

جاڭا ءبىلىم ورداسىندا تەك باستاۋىش سىنىپتار وقيدى. قازىر مەكتەپتىڭ قوس بولىگىندە جالپى سانى 420عا جۋىق وقۋشى ءبىلىم الىپ ءجۇر.

«ءبىز 2022-جىلى قۇجاتتاردى راسىمدەۋ جۇمىسىمەن اينالىستىق. كەيىن ەل ۇكىمەتى بۇل مەكتەپتىڭ قۇرىلىسىن 2023-جىلدىڭ جوسپارىنا ەنگىزىپ بەردى. قۇرىلىسى بيىل قازان ايىندا اياقتالدى. ءبىلىم ورداسى بارلىق زامان تالابىنا ساي كەلەدى»، - دەدى مەكتەپتى سالعان قۇرىلىس كومپانياسى ديرەكتورىنىڭ ورىنباسارى ۇلدانا داۋلەتوۆا.