وزبەكستاندا حايۋاناتتار باعىنداعى توردان شىعىپ كەتكەن 3 ارىستان كۇزەتشىنى تالاپ ءولتىردى

تاشكەنت. KAZINFORM - تاشكەنت وبلىسىنىڭ پاركەنت اۋدانىندا ورنالاسقان Lion Park حايۋاناتتار باعىندا 3 ارىستان توردان شىعىپ كەتىپ، كۇزەتشىگە شابۋىل جاسادى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.

وبلىستىق ىشكى ىستەر باسقارماسىنىڭ مالىمەتىنشە، وقيعا تاڭعى ساعات 05:00 شاماسىندا بولعان. ءبىر توردىڭ ىشىندە قامالىپ تۇرعان 3 ارىستان قورشالعان اۋماقتان شىعىپ كەتكەن. بۇل ۋاقىتتا حايۋاناتتار باعى كەلۋشىلەر ءۇشىن جابىق ەدى.

جىرتقىشتاردى تورعا قايتارۋعا تىرىسقان 44 جاستاعى كۇزەتشىگە ارىستاندار شابۋىل جاساعان. سالدارىنان ەر ادام كوز جۇمدى.

كەيىن حايۋاناتتار باعىنىڭ قىزمەتكەرلەرى ارىستانداردى ارنايى تورعا قايتا قامادى.

باس پروكۋراتۋرانىڭ باسپا ءسوز قىزمەتىنەن حابارلاعانداي، ماماندار 2 ارىستاندى ترانكۆيليزاتوردىڭ كومەگىمەن تورعا قاماپ، ءۇشىنشىسىن اتىپ ولتىرگەن.

وقيعادان كەيىن حايۋاناتتار باعىنىڭ قىزمەتكەرلەرى بارلىق جىرتقىشتاردىڭ ورنالاسقان ورىنىنا تەكسەرىس جۇرگىزگەن. جەرگىلىكتى بيلىك وكىلدەرى ءمالىم ەتكەندەي، حالىققا ەشقانداي قاۋىپ جوق، كۇزەتشىدەن باسقا ەشكىم زارداپ شەكپەگەن.

ەسكە سالايىق، كەلەر جىلدان وزبەكستانداعى سيركتەردە جابايى جانۋارلاردى پايدالانۋعا تىيىم سالىنادى.

اۆتور

ءاليحان اسقار