وزبەكستاندا حالىقارالىق اقىندار ايتىسى ءوتتى
وزبەكستان استاناسىندا كەيىنگى 7 جىلدا ءبىرىنشى رەت حالىقارالىق اقىندار ايتىسى ءوتتى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.
جىر دوداسى جەرگىلىكتى قازاق مادەني ورتالىعىنىڭ قولداۋىمەن ۇيىمداستىرىلدى. ايتىسقا قازاقستان، قىرعىزستان جانە وزبەكستاننان بارلىعى 10 اقىن قاتىستى.
«ايتىس جوعارى دەڭگەيدە ءوتتى. بارىنە راقمەت! جاڭا جىل بارىمىزگە تابىس اكەلسىن. ەلىمىز، جۇرتىمىز تىنىش بولسىن!»، - دەدى ايتىس تاماشالاۋعا كەلگەن تاشكەنت قالاسىنىڭ تۇرعىنى سانابات ساپاربەكوۆا.
اقىندار ايتىسى 60 جىلدان بەرى جەرگىلىكتى تەلەارنا ەفيرىنەن كورسەتىلىپ كەلە جاتقان «زامانداس-ديدار» باعدارلاماسىنىڭ مەرەيتويىنا ورايلاستىرىلدى. شىعارماشىلىق ۇجىم وزبەكستاننىڭ تۇكپىر-تۇكپىرىن ارالاپ، قانداستاردىڭ تىنىس-تىرشىلىگىن باياندايدى.
«كورشى قونعان اۋىل ادامدارىن ەرەكشە سىيلاعان حالىقپىز. سول يگى ءداستۇردىڭ جالعاسىنا تاعى كۋا بولدى. قازاقستان، قىرعىزستاننىڭ ونەر يەلەرى وزبەكستاننىڭ ونەرپازدارىمەن بىرگە دوستاسىپ، ءبىر-بىرلەرىن قولداپ، وسى «زامانداس-ديداردى» جىرلاپ جاتىر. بۇگىنگى كۇنى قازاقستان مەن وزبەكستاننىڭ اراسىنداعى جەتىستىكتىڭ ءبارى سىيلاستىقتىڭ ارقاسى»، - دەپ ءمالىم ەتتى «زامانداس-ديدار» باعدارلاماسىنىڭ اعا رەداكتورى انار نالىبايەۆا.
جىر بايگەسى 4 ساعاتقا سوزىلدى. شەشۋشى سىندا قازاقستاندىق نۇرلان ەسەنقۇلوۆ پەن وزبەكستاندىق قانداس تالعات ورىنبەكوۆ كەزدەسىپ، ن. ەسەنقۇلوۆ باسىم ءتۇستى. قىرعىزستان جانە قاراقالپاقستان اتىنان سىنعا تۇسكەندەر دە جۇلدە ەنشىلەدى.
ايتا كەتەيىك، جالپى سانى 10 اقىن قاتىسقان ايتىستىڭ باس جۇلدەسىنە 10 ميلليون سۋم (400 مىڭ تەڭگە) تىگىلدى، ال جالپى جۇلدە قورى 1 ميلليون تەڭگەگە جۋىقتادى.
اۆتور
ءاليحان اسقار
