وزبەكستاندا حالىق ساناعىن وتكىزۋ ءۇشىن قانشا قاراجات قاجەت ەكەنى ايتىلدى

تاشكەنت. KAZINFORM - الدىن الا ەسەپكە ساي، وزبەكستاندا حالىق ساناعىن وتكىزۋ ءۇشىن 800 ميلليارد سۋم (63,4 ميلليون دوللار) قاجەت. بۇل تۋرالى جۋرناليستەردىڭ قاتىسۋىمەن وتكەن باسپا ءسوز ماسليحاتى بارىسىندا ستاتيستيكا اگەنتتىگىنىڭ ساناق پروتسەستەرىن ۇيىمداستىرۋ جانە وتكىزۋ باسقارماسىنىڭ باستىعى كوبيل بەرديكۋلوۆ ءمالىم ەتتى، دەپ حابارلايدى Kazinform اگەنتتىگىنىڭ تاشكەنتتەگى مەنشىكتى ءتىلشىسى ءاليحان اسقار.

حالىق ساناعىن ۇيىمداستىرۋدىڭ كۇردەلى پروتسەسس ەكەنىن جانە وعان باعىتتالاتىن شىعىنداردى ەسكەرە وتىرىپ، ونى وتكىزۋ 2025-2026 -جىلدارعا جوسپارلانعان.

«حالىق ساناعىن وتكىزۋگە دايىندىق 2019 -جىلى باستالدى. 2021 -جىلى ءبىز 4 وڭىردە پيلوتتىق نەگىزدە حالىق ساناعىن جۇرگىزدىك، ول جولى ءۇش ءادىستى قولدانىپ كوردىك. قازىر ءبىز رەسپۋبليكادا زاماناۋي اقپاراتتىق تەحنولوگيالاردى پايدالانا وتىرىپ، ياعني پلانشەتتەردىڭ كومەگىمەن ينتەرنەت ارقىلى حالىق ساناعىن جۇرگىزۋدى جوسپارلاپ وتىرمىز. 2020 -جىلى بۇل ءىس-شارا پاندەمياعا بايلانىستى كەيىنگە قالدىرىلدى»، - دەپ ءمالىم ەتتى كوبيل بەرديكۋلوۆ.

وزبەكستان پرەزيدەنتىنىڭ 2024 -جىلعى 4-ناۋرىزداعى قاۋلىسىنا ساي، ستاتيستيكا اگەنتتىگى بيىل ساناققا دايىندىق جۇمىستارىن جالعاستىرۋى ءتيىس. اتاپ ايتقاندا، ۆەدومستۆوعا حالىق ساناعىن ناسيحاتتاۋ ءۇشىن بەينەروليك، باننەرلەر مەن بۋكلەتتەر ازىرلەۋ، 2021 -جىلى جۇرگىزىلگەن پيلوتتىق ساناق ناتيجەلەرى مەن حالىقارالىق ساراپشىلاردىڭ ۇسىنىسىن ەسكەرىپ، سالانى جەتىلدىرۋ تاپسىرىلدى.

حالىق ساناعىنىڭ ناتيجەسىن ازىرلەۋ جانە جاريالاۋ 2026-2027 -جىلدارعا جوسپارلانىپ وتىر.

توقتالا كەتەيىك، وزبەكستاندا حالىق ساناعى 1989 -جىلدان بەرى جۇرگىزىلمەگەن. پاندەمياعا بايلانىستى ول 2022 -جىلدان 2023 -جىلدىڭ قاراشاسىنا اۋىستىرىلدى، دەگەنمەن بۇل شاراعا ءالى قاراجات بولىنبەگەن.

قوسا كەتسەك، بيىل 1-قاڭتارداعى ستاتيستيكا اگەنتتىگىنىڭ مالىمەتىنە ساي، وزبەكستانداعى تۇراقتى حالىق سانى - 36799756 ادام. 2023 -جىلدىڭ سايكەس كەزەڭىنە قاراعاندا بىلتىرعى ءوسىم %2,2 شاماسىندا بولدى.

اۆتور
ءاليحان اسقار