وزبەكستاندا گاز قۇيۋ ستانسيالارىنىڭ جارتىسىنان استامى جۇمىسىن توقتاتتى

13-جەلتوقساننان باستاپ وزبەكستاننىڭ 5 وبلىسى مەن تاشكەنت قالاسىنداعى گاز قۇيۋ ستانسيالارىنىڭ جارتىسىنان استامى قىزمەت كورسەتۋدى توقتاتتى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.

«حۋدۋدگازتامينوت» كومپانياسىنان مالىمدەگەندەي، اۋا-رايىنىڭ كۇرت سالقىنداۋىنا بايلانىستى بۇكىل ەل بويىنشا تابيعي جانە سۇيىتىلعان گازدى تۇتىنۋ كولەمى وسكەن.

«گاز تۇتىنۋشىلارعا ىركىلىسسىز كوگىلدىر وتىندى جەتكىزۋ ماقساتىندا تاشكەنت قالاسىندا، سامارقاند، انديجان، نامانعان، فەرعانا جانە تاشكەنت وبلىستارىندا گاز قۇيۋ بەكەتتەرىنىڭ قىزمەتىنە قوسىمشا شەكتەۋ ەنگىزىلدى. قازىرگى ۋاقىتتا 1179 جانارماي قۇيۋ بەكەتىنىڭ 547 سى بۇرىن بەلگىلەنگەن كەستەگە ساي جۇمىس ىستەپ تۇر»، - دەلىنگەن كومپانيا تاراتقان حابارلامادا.

بۇعان دەيىن حابارلاعانىمىزداي، قىسىمىنىڭ تومەندەۋىنە بايلانىستى 12-جەلتوقساننان باستاپ وزبەكستانداعى گاز قۇيۋ بەكەتتەرى كۇنىنە 6 ساعاتتىق جۇمىس كەستەسىنە كوشكەن ەدى. ياعني، ستانسيالار 6:00 دەن 12:00 گە دەيىن قىزمەت كورسەتەدى.

ەسكە سالايىق، گاز قۇيۋ بەكەتتەرىنىڭ جۇمىس ۋاقىتى بۇعان دەيىن دە شەكتەلگەن. اتاپ ايتقاندا، ستانسيالار 9-جەلتوقساننان باستاپ 6:00 دەن 15:00 گە دەيىن قىزمەت كورسەتىپ كەلدى.

اۆتور

ءاليحان اسقار