وزبەكستاندا ابايدىڭ 180 جىلدىعى كەڭىنەن تويلانىپ جاتىر
تاشكەنت. KAZINFORM - وزبەكستاندا اباي قۇنانباي ۇلىنىڭ تۋعانىنا 180 جىل تولۋىنا وراي ءتۇرلى مادەني جانە ادەبي ءىس-شارالار لەگى باستالىپ كەتتى. بۇل يگى باستاما ەكى ەل اراسىنداعى دوستىق پەن رۋحاني ىنتىماقتاستىقتىڭ جارقىن كورىنىسى رەتىندە جوعارى باعالانىپ وتىر، دەپ حابارلايدى Kazinform ءتىلشىسى.
وسىنداي تاعىلىمدى شارالاردىڭ ءبىرى ناۋاي وبلىسى، ءۇشقۇدىق اۋدانىنا قاراستى، ايگىلى ءشامشى انىنە قوسقان مىڭبۇلاق اۋىلىنداعى مەكتەپتە ءوتتى. وقۋشىلار اقىن شىعارماشىلىعىن كەڭىنەن ناسيحاتتاپ، ونىڭ ونەگەلى ءومىر جولىن تەرەڭىرەك تانۋعا مۇمكىندىك الدى.
- اباي - تەك قازاق حالقىنىڭ عانا ەمەس، بۇكىل تۇركى دۇنيەسىنىڭ رۋحاني شامشىراعى. وزبەك جۇرتشىلىعى دا ونى تەرەڭ قۇرمەتتەيدى. ابايدىڭ دانالىق ءسوزى، ادامگەرشىلىككە ۇندەگەن ءىلىمى - بۇگىنگى زامانمەن ۇندەسىپ جاتىر، - دەدى وبلىستىق مادەني ورتالىق باسشىسى سەرىجان جاناحمەتوۆ.
ءۇشقۇدىق اۋدانىنا قاراستى مىڭبۇلاق اۋىلىندا ۇلى اقىننىڭ 180 جىلدىعىنا وراي «اباي - دانا، اباي - دارا» اتتى جىر بايگەسى ءوتتى. سايىسقا اۋدانداعى قازاق تىلىندە ءبىلىم بەرەتىن بەس مەكتەپتەن وقۋشىلار قاتىستى.
مىڭبۇلاقتاعى 11-مەكتەپ ديرەكتورى ەرلان قوناربايەۆتىڭ ايتۋىنشا، بۇل باستاما جاس ۇرپاقتى ۇلتتىق رۋحتا تاربيەلەۋگە، اباي ءىلىمىن ناسيحاتتاپ، ءسوز ونەرىنە، تەرەڭ وي مەن پاراساتقا باۋلۋعا باعىتتالعان.
- اباي - قازاق رۋحانياتىنىڭ التىن دىڭگەگى. ونىڭ ءاربىر ءسوزى - ومىرلىك تاعىلىم. بالالاردىڭ اقىن مۇراسىن قۇر جاتتاپ قانا قويماي، جۇرەكپەن ۇعىنا بىلگەنى ماڭىزدى، - دەدى مەكتەپ ديرەكتورى.
مادەني- تانىمدىق ءىس-شارا بارىسىندا «بالا داۋىسى» اتتى ءان-بايقاۋى دا وتكىزىلىپ، ابايدىڭ اندەرى شىرقالدى.
سونىمەن قاتار اۋداندىق دەڭگەيدە فۋتبول جارىسى ۇيىمداستىرىلىپ، 9 مەكتەپ كوماندالارى اراسىندا مىقتىلار انىقتالدى.
ايتا كەتەيىك، وزبەكستان مەكتەپتەرىندە اباي شىعارمالارى وزبەك تىلىنە اۋدارىلىپ، وقۋ باعدارلاماسىنا ەنگىزىلگەن. بۇل - جاس ۇرپاقتىڭ قوس حالىقتىڭ ورتاق رۋحاني قازىنالارىن تەرەڭ ۇعىنۋىنا ۇلكەن جول اشىپ وتىر.
بۇعان دەيىن وزبەكستاندا ۇلى ابايدىڭ 180 جىلدىعى كەڭ اۋقىمدا اتالىپ وتەتىنىن جازعان ەدىك.
