وزبەكستاندا 120دان استام ۇيىمداسقان قىلمىستىق توپ مۇشەلەرى ۇستالدى

  وزبەكستاننىڭ 4 وڭىرىندە كريمينوگەندىك جاعدايدى جاقسارتۋ بويىنشا جۇرگىزىلگەن جەدەل الدىن الۋ شاراسى اياسىندا قىلمىستىق ارەكەتتەرگە قاتىسى بار بولۋى مۇمكىن 124 كۇدىكتى ۇستالدى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.

ءى ءى م- ءنىڭ بۇحارا وبلىستىق باسقارماسىنان مالىمدەگەندەي، وڭىردە ىزدەۋدە جۇرگەن 31 قىلمىسكەر قۇرىقتالدى.

اتالعان شارا بارىسىندا ادام ۇرلاۋ مەن توناۋ بويىنشا – 1، ەسىرتكى جانە پسيحوتروپتىق پرەپاراتتاردىڭ زاڭسىز اينالىمىنا قاتىستى – 8، زاڭسىز قارۋ ساقتاۋ بويىنشا - 2 جانە وزگە دە قىلمىستاردىڭ 9 فاكتىسى انىقتالدى. وسىعان بايلانىستى 5 كۇدىكتى قاماۋعا الىنسا، 15 ادامعا باسقا دا بۇلتارتپاۋ شارالارى قولدانىلعان.

سونىمەن قاتار 98 اداممەن پروفيلاكتيكالىق جۇمىس جۇرگىزىلىپ، ايماقتاعى كريمينوگەندىك جاعدايعا تەرىس اسەر ەتكەن 38 ازامات اكىمشىلىك قاماۋعا الىندى.

سامارقاند وبلىسىندا ارنايى قىزمەت ماماندارى مەن قۇقىق قورعاۋ ورگاندارى قىلمىستىق توپتىڭ 47 مۇشەسىن ۇستادى. ولاردىڭ التاۋىنا قاتىستى قىلمىستىق ءىس قوزعالدى، ال 25 ءى اكىمشىلىك جاۋاپقا تارتىلدى.

تاشكەنت وبلىسىندا قىلمىستىق توپتارعا قاتىسى بار بولۋى ىقتيمال 34 ادامنىڭ قىزمەتىنە شەكتەۋ قويىلدى. ونىڭ ىشىندە 11 ازاماتتىڭ ۇستىنەن قىلمىستىق ءىس قوزعالدى، 23 ازامات اكىمشىلىك قاماۋعا الىندى. ۇستالعانداردان 13 پنيەۆماتيكالىق جانە اڭشىلىق قارۋ، وق-دارىلەر مەن ەلەكتروشوكەرلەر، پىشاقتار جانە كاستەتتەر تاركىلەندى.

سونىمەن قاتار، ەسىرتكى زاتتارىنىڭ زاڭسىز اينالىمىنا بايلانىستى 50 دەن استام فاكتى انىقتالدى. 11 كەلى ەسىرتكى جانە 8703 پسيحوتروپتىق ءدارى تاركىلەندى. قىلمىس جاساعانى ءۇشىن ىزدەۋدە جۇرگەن، سوتتان جانە تەرگەۋ ورگاندارىنان جاسىرىنعان 64 ادام قۇرىقتالدى.

سونداي-اق، انديجان وبلىسىندا قىلمىستىق توپتىڭ 4 وكىلى ۇستالدى، ونىڭ بىرەۋى بۇرىن سوتتالعان. ولار تۇرمىستىق زورلىق-زومبىلىققا، ۇساق بۇزاقىلىققا، ۆاليۋتالاردى زاڭسىز الۋعا نەمەسە بەرۋگە بايلانىستى قىلمىستار جاسادى دەگەن كۇدىككە ءىلىندى.

قوسا كەتسەك، بۇعان دەيىن وزبەكستانداعى ۇيىمداسقان قىلمىستىق توپتاردى انىقتاۋ جانە ۇستاۋ بويىنشا اۋقىمدى شارا ءجۇرىپ جاتقانىن حابارلاپ ەدىك.