وزبەكستاندا 1 مىڭنان استام ساياسي قۋعىن-سۇرگىن قۇربانى اقتالدى
وزبەكستاندا كەڭەس ۇكىمەتى كەزىندە قۋعىن-سۇرگىنگە ۇشىراعان 1 مىڭنان استام ادام اقتالدى.
بۇل تۋرالى «جاديدتەر: ۇلتتىق بىرەگەيلىك، تاۋەلسىزدىك جانە مەملەكەتتىلىك يدەيالارى» اتتى حالىقارالىق عىلىمي كونفەرەنسيا قاتىسۋشىلارىنا جولداعان حاتىندا پرەزيدەنت شاۆكات ميرزيەيەۆ ءمالىم ەتتى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.
وزبەكستان باسشىسى جاڭا تاريحي داۋىرگە اياق باسقان ۋاقىتتا اتا-بابا سالعان سارا جولدان جاڭىلماي، ولاردىڭ ەڭبەگىن ءتيىستى دەڭگەيدە باعالاۋ، باي مۇراسىن زەرتتەۋ جانە دارىپتەۋ نەگىزگى مىندەت ەكەنىن اتاپ ءوتتى.
«كونفەرەنسيانىڭ نەگىزگى تاقىرىبى - ءبىزدىڭ اعارتۋشى اتا-بابالارىمىزدىڭ پروگرەسسيۆتى يدەيالارى مەن كوزقاراستارىن زەرتتەۋ جانە جۇيەلەۋ. سونداي-اق، تۇركىستان جاديدتەرىنىڭ ۇلتتىق مەملەكەتتىلىكتىڭ دامۋ ساتىسىنداعى ءرولى مەن اسەرىن زەرتتەۋ ەرەكشە ماڭىزعا يە»، — دەدى شاۆكات ميرزيەيەۆ.
پرەزيدەنت اتاپ وتكەندەي، بۇگىندە وزبەكستاندا حالىق بوستاندىعى مەن وتاننىڭ وركەندەۋى ءۇشىن ءوز ءومىرىن قيعان اتا-بابالاردى ەسكە الۋعا، ولاردىڭ قىزمەتى مەن مۇراسىن وزگە قىرىنان زەرتتەۋگە ەرەكشە نازار اۋدارىلادى.
«سوڭعى جىلدارى وزبەكستاننىڭ جوعارعى سوتى توتاليتارلىق رەجيم قۋعىن-سۇرگىنىنىڭ قۇربانى بولعان 1030 دان استام وتانداستى اقتادى. بۇل تاريحي ادىلەتتىلىكتى ورناتۋ جولىنداعى تاعى ءبىر قادام بولدى»، - دەپ اتاپ ءوتتى پرەزيدەنت.
وزبەكستان باسشىسى 31- تامىز ەلدە قۋعىن-سۇرگىن قۇرباندارىن ەسكە الۋ كۇنى رەتىندە كەڭىنەن اتالىپ وتەتىنىن ەسكە سالدى.
«ماحاللادا قۋعىن-سۇرگىن قۇرباندارىن ەسكە الۋ بۇرىشتارىن جانە وندا ەسكە الۋ كىتاپتارىن اشۋ، 100 گە جۋىق قۋعىن-سۇرگىن قۇرباندارى مەن جاديدتەردىڭ ءومىرى مەن قىزمەتىنە ارنالعان جيناقتاردى جىل سايىن دايىنداۋ جانە باسىپ شىعارۋ كوزدەلگەن. وسى ماڭىزدى تاقىرىپقا بايلانىستى مۇراعات قۇجاتتارىنا قولجەتىمدىلىكتى كەڭەيتۋ، ماقساتتى عىلىمي-زەرتتەۋ جۇمىستارىن جۇرگىزۋگە گرانت ءبولۋ، جاڭا كوركەم جانە پۋبليتسيستيكالىق تۋىندىلار جاساۋ بويىنشا شارالار قابىلدانىپ جاتىر»، - دەپ تۇيىندەدى شاۆكات ميرزيەيەۆ.
