وزبەكستانعا بارۋ ءۇشىن ەندى پاسپورت قاجەت بولماۋى مۇمكىن
استانا. قازاقپارات - قازاقستان مەن وزبەكستان اراسىندا ازاماتتاردىڭ جەكە كۋالىگىن ءوزارا تانۋ بويىنشا كەلىسسوز ءجۇرىپ جاتىر.
كورشىلەس وزبەك ەلىنە باراتىن وتانداستارىمىز ءۇشىن الداعى ۋاقىتتا پاسپورت قاجەت بولماۋى مۇمكىن، دەپ حابارلادى سايتى Qazaqstan ارناسى.
قازاقستان مەن وزبەكستان اراسىندا ازاماتتاردىڭ جەكە كۋالىگىن ءوزارا تانۋ بويىنشا كەلىسسوز ءجۇرىپ جاتىر.
«بۇل تۋرالى وزبەكستان پرەزيدەنتىنىڭ سىرتقى ساياسات جونىندەگى ارنايى وكىلى مالىمدەدى. «ورتالىق ازيا ەلدەرى اراسىنداعى شەكارا دوستىق پەن تاتۋ كورشىلىك كوپىرىنە اينالدى. وتكەن جىلدىڭ قىركۇيەگىنەن بەرى تۇرعىندار جەكە كۋالىكتى كورسەتۋ ارقىلى وزبەك- قىرعىز شەكاراسىن كەسىپ وتە الادى. ەندى وسىنداي ەرەجە قازاقستانمەن دە تالقىلانىپ جاتىر»، - دەدى ول.
جۋىردا وتكەن استانا سامميتىندە وزبەكستان پرەزيدەنتى شاۆكات ميرزيەيەۆ ورتالىق ازيا ەلدەرىنە ۇلتتىق جەكە كۋالىكتەردى ءوزارا تانۋدى ۇسىنعان بولاتىن. بۇل كورشى مەملەكەتتەردىڭ ءتۋريزمدى دامىتۋىنا وڭ سەپتىگىن تيگىزەدى.
