وزبەكستان يادرولىق قاۋىپسىزدىك جونىندەگى حالىقارالىق شارتتارعا قوسىلۋعا مۇددەلى
تاشكەنت. KAZINFORM - وزبەكستان پرەزيدەنتى شاۆكات ميرزيەيەۆ ونەركاسىپتىك، رادياتسيالىق جانە يادرولىق قاۋىپسىزدىك سالاسىنداعى مەملەكەتتىك باقىلاۋ جۇيەسىن جەتىلدىرۋگە باعىتتالعان جارلىققا قول قويدى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.
قۇجات ەلدىڭ يادرولىق قاۋىپسىزدىك سالاسىنداعى ءبىرقاتار حالىقارالىق شارتتارعا قوسىلۋى ءۇشىن دايىندىق باستاۋعا باعىتتالعان.
- وزبەكستان رەسپۋبليكاسىنىڭ قوسىلۋى ءتيىس يادرولىق قاۋىپسىزدىك سالاسىنداعى حالىقارالىق شارتتاردىڭ تىزبەسى بەكىتىلسىن، - دەلىنگەن شاۆكات ميرزيەيەۆ قول قويعان جارلىقتا.
اتاپ ايتقاندا، وزبەكستان يادرولىق زالال ءۇشىن ازاماتتىق جاۋاپكەرشىلىك تۋرالى ۆەنا كونۆەنتسياسىنا، يادرولىق نەمەسە رادياتسيالىق اپات جاعداي كەزىندەگى كومەك كونۆەنتسياسى مەن يادرولىق قاۋىپسىزدىك تۋرالى كونۆەنتسياعا قوسىلۋعا نيەتتى.
ەسكە سالايىق، وزبەكستان مەن ا ە ح ا اتوم ەنەرگەتيكاسى سالاسىنداعى ىنتىماقتاستىقتى نىعايتۋعا نيەتتى.
بۇعان دەيىن جازعانىمىزداي، وزبەكستاندا رەسەيلىك تەحنولوگيا بويىنشا وڭىردەگى العاشقى از قۋاتتى اتوم ەلەكتر ستانتسياسى سالىنادى.
تاياۋدا وزبەكستان مەن رەسەي ا ە س سالۋ كەلىسىمشارتىنىڭ كۇشىنە ەنۋ حاتتاماسىنا قول قويدى.
مۇنىمەن قاتار، وزبەكستان مەن قىتاي شاعىن يادرولىق رەاكتورلاردى قولدانۋ مۇمكىندىگىن زەردەلەمەك.
