وزبەكستان پرەزيدەنتى ەرتەڭ قازاقستانعا جۇمىس ساپارىمەن كەلەدى

تاشكەنت. KAZINFORM - وزبەكستان پرەزيدەنتى شاۆكات ميرزيەيەۆ 3-4-شىلدەدە شانحاي ىنتىماقتاستىق ۇيىمى مەملەكەت باسشىلارى كەڭەسىنىڭ كەزەكتى وتىرىسىنا قاتىسۋ ءۇشىن قازاقستانعا جۇمىس ساپارىمەن بارادى، دەپ حابارلايدى Kazinform اگەنتتىگىنىڭ تاشكەنتتەگى مەنشىكتى ءتىلشىسى ءاليحان اسقار.

وزبەكستان پرەزيدەنتىنىڭ باسپا ءسوز قىزمەتىنەن ءمالىم ەتكەندەي، شاۆكات ميرزيەيەۆ مەملەكەت باسشىلارىنىڭ كەڭەسىمەن قاتار، «ش ى ۇ پليۋس» فورماتىنداعى كەزدەسۋگە قاتىسادى.

سامميت بارىسىندا ش ى ۇ اياسىنداعى كوپجوسپارلى ىنتىماقتاستىقتى دامىتۋ جانە ۇيىم قىزمەتىن جەتىلدىرۋ ماسەلەلەرى قارالادى. بۇعان قوسا، حالىقارالىق جانە وڭىرلىك ءوزارا ءىس-قيمىل ماسەلەلەرى دە تالقىلانباق.

كەزدەسۋ قورىتىندىسى بويىنشا استانا دەكلاراتسياسىن جانە ەكونوميكا، قاۋىپسىزدىك، ەكولوگيا، ەنەرگەتيكا، تۋريزم جانە وزگە دە باعىتتاعى ارىپتەستىكتى كەڭەيتۋگە ارنالعان قۇجاتتاردى قابىلداۋ جوسپارلانىپ وتىر.

مۇنىمەن قاتار وزبەكستان پرەزيدەنتى استاناعا جاسايتىن جۇمىس ساپارى بارىسىندا ءبىرقاتار شەتەلدىك دەلەگاتسيا باسشىلارىمەن ەكىجاقتى كەزدەسۋلەر وتكىزەدى.

ەسكە سالايىق، 3-4-شىلدەدە استانادا شانحاي ىنتىماقتاستىق ۇيىمىنىڭ ءسامميتى وتەدى. مەملەكەت باسشىلارىنىڭ كەزدەسۋى بارىسىندا ەلوردانىڭ اۋە كەڭىستىگى كۇشەيتىلگەن رەجيمدە كۇزەتىلەدى. سونداي-اق، استانا قالاسىنىڭ توڭىرەگىنە بلوك-پوستتار قويىلىپ، ءدىني نىساندار باقىلاۋعا الىندى.