وزبەكستان پرەزيدەنتى كونستيتۋتسياسى كۇنىنە وراي ءبىر توپ سوتتالعاندارعا راقىمشىلىق جاسادى

وزبەكستان رەسپۋبليكاسى كونستيتۋتسياسىنىڭ قابىلدانعانىنا 31 جىل تولۋىنا وراي وزبەكستان رەسپۋبليكاسى پرەزيدەنتى شاۆكات ميرزيەيەۆ «جازاسىن وتەپ جاتقان، جاساعان ءىس-ارەكەتىنە شىن جۇرەكتەن وكىنگەن جانە كىنالى دەپ تانىلعان ءبىر توپ ادامدارعا راقىمشىلىق جاساۋ تۋرالى» جارلىققا قول قويدى دەپ حابارلايدى Kazinform اگەنتتىگى وزبەكستان رەسپۋبليكاسى پرەزيدەنتىنىڭ باسپا ءسوز قىزمەتىنە سىلتەمە جاساپ.

قاۋلىعا سايكەس، وزبەكستان رەسپۋبليكاسى كونستيتۋتسياسىنىڭ 109-بابى، 23-تارماعىنا سايكەس جاساعان قىلمىستارى ءۇشىن قىلمىستىق-اتقارۋ جۇيەسى مەكەمەلەرىندە جانە پروباتسيا ورگاندارىندا جازاسىن وتەپ جاتقان، جاساعان ارەكەتىنە شىن جۇرەكتەن وكىنىپ، ءوزىن جاقسى جاعىنان كورسەتە بىلگەن 334 ادامعا كەشىرىم جاسالدى.

راقىمشىلىق جاسالعان تۇلعالاردىڭ 34 ءى نەگىزگى جازادان تولىق بوساتىلسا، 249 ى جازاسىن وتەۋ مەرزىمىنەن بۇرىن شارتتى تۇردە بوساتىلدى، 6 تۇلعانىڭ باس بوستاندىعىنان ايىرۋ جازاسى جەڭىلىرەك جازامەن اۋىستىرىلدى. سونداي-اق 45 ادامنىڭ باس بوستاندىعىنان ايىرۋ تۋرالى جازا مەرزىمى قىسقاردى.

راقىمشىلىق جاسالعانداردىڭ 18 ءى شەتەل ازاماتتارى، 23 ءى ايەلدەر، 15 ءى 60 جاستان اسقاندار، 88 ءى تىيىم سالىنعان ۇيىمداردىڭ قىزمەتىنە قاتىسقاندار.

جارلىقتىڭ ورىندالۋىنا بايلانىستى جاۋاپتى مينيسترلىكتەر مەن ۆەدومستۆولارعا راقىمشىلىق جاسالعان ازاماتتاردىڭ وتباسى مەن جاقىندارىنا ورالۋىنا، قوعامدىق ومىرگە بەيىمدەلۋىنە، پايدالى ەڭبەكپەن اينالىسۋىنا، سالاۋاتتى ءومىر سالتىن قالىپتاستىرۋعا، قوعامدا لايىقتى ورنىن تابۋعا كومەكتەسۋ جونىندە تاپسىرمالار بەرىلدى.