وزبەكستان مەن قىرعىزستان پرەزيدەنتتەرى بەيرەسمي كەزدەسۋ وتكىزدى
تاشكەنت. KAZINFORM - وزبەكستان باسشىسى شاۆكات ميرزيەيەۆ پەن قىرعىزستان پرەزيدەنتى سادىر جاپاروۆ تاشكەنت وبلىسىندا ورنالاسقان «اميرسوي» تاۋ- شاڭعى كۋرورتىندا بەيرەسمي كەزدەسۋ وتكىزدى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.

- پرەزيدەنتتەر ەكى ەل اراسىنداعى ىنتىماقتاستىقتى نىعايتۋعا ىقپال ەتەتىن ءوزارا ءىس - قيمىلدار بارىسىن تالقىلاپ، حالىقارالىق ساياسي جاعدايلارعا قاتىستى پىكىر الماستى، - دەلىنگەن وزبەكستان پرەزيدەنتىنىڭ باسپا ءسوز قىزمەتى تاراتقان حابارلامادا.
قوس ەل باسشىلارى وزبەكستان مەن قىرعىزستاننىڭ تابيعي ەرەكشەلىكتەرىن ەسكەرە وتىرىپ، كۋرورتتىق ورتالىقتار قۇرۋ باعىتىندا بىرلەسكەن جوبالاردى ىلگەرىلەتۋگە ۋاعدالاستى.
بۇعان دەيىن حابارلاعانىمىزداي، وزبەكستان مەن قىرعىزستان تاۋار اينالىمىن 2 ميلليارد دوللارعا جەتكىزۋگە نيەتتى.
سونىمەن قاتار، بىلتىر وزبەكستان مەن قىرعىزستان شەكاراسىندا 2 وتكىزۋ بەكەتى اشىلدى.