وزبەكستان وكىلى حالىقارالىق بوكس ۇيىمىندا گولوۆكيننىڭ ورىنباسارى بولدى

استانا. KAZINFORM - وزبەكستان بوكس فەدەراتسياسىنىڭ باس حاتشىسى ميرشوحيد تيللابويەۆ گەننادي گولوۆكين باسقاراتىن World Boxing حالىقارالىق ۇيىمىنىڭ ۆيتسە-پرەزيدەنتى بولىپ سايلاندى، دەپ حابارلايدى Boxing Uzbekistan Telegram ارناسى.

Геннадий Головкин
Фото: НОК РК

سايلاۋ 20-قاراشادا پاناما قالاسىندا وتكەن World Boxing كونگرەسىندە ءوتتى.

وزبەكستان بوكس فەدەراتسياسىنىڭ مالىمەتىنشە، داۋىس بەرۋگە 95 ۇلتتىق بوكس فەدەراتسياسىنىڭ وكىلدەرى قاتىسقان. داۋىس بەرۋ قورىتىندىسى بويىنشا ميرشوحيد تيللابويەۆ قارسىلاستارىنان الدەقايدا كوپ داۋىس جيناپ، World Boxing ۇيىمىنىڭ ۆيتسە-پرەزيدەنتى بولىپ سايلاندى.

وسىلايشا ول World Boxing ۇيىمىندا جوعارى باسشىلىق قىزمەتكە سايلانعان وزبەكستاننىڭ العاشقى وكىلى اتاندى.

ايتا كەتەيىك، بۇل لاۋازىمعا قازاقستاندىق سپورت قايراتكەرى راۋان يگەنيەۆ تە ۇمىتكەر بولعان ەدى.

سونىمەن قاتار بۇعان دەيىن قازاقستان رەسپۋبليكاسى ۇلتتىق وليمپيادالىق كوميتەتىنىڭ باسشىسى گەنناديي گولوۆكين يسلام ىنتىماقتاستىعى سپورت قاۋىمداستىعىنىڭ (ISSA) ۆيتسە-پرەزيدەنتى بولىپ سايلانعانى حابارلانعان بولاتىن.