وزبەكستان تۇرعىندارىنىڭ 12 پايىزى جوعارى ءبىلىم العان
استانا. KAZINFORM - وزبەكستاندا جۇرگىزىلگەن حالىق ساناعىنىڭ ناتيجەسى بويىنشا 15 جاستان اسقان 3,2 ميلليوننان استام ادامنىڭ جوعارى جانە جوعارى وقۋ ورنىنان كەيىنگى ءبىلىمى بار. بۇل اتالعان جاس توبىنداعى تۇرعىنداردىڭ 12 پايىزىن قۇرايدى، دەپ حابارلايدى Kazinform.
ۇلتتىق ستاتيستيكا كوميتەتىنىڭ مالىمەتىنشە، 9,7 ميلليون ادام (35,8 پايىز) ورتا ارناۋلى جانە كاسىپتىك ءبىلىم العان. ال 11,6 ميلليون تۇرعىننىڭ (42,8 پايىز) جالپى ورتا ءبىلىمى بار. https://t.me/statistika_ru/1586
15 جاستان اسقان ءاربىر 1000 ادامنىڭ 120 سى جوعارى جانە جوعارى وقۋ ورنىنان كەيىنگى، 358 ى ورتا ارناۋلى جانە كاسىپتىك، ال 428 ى جالپى ورتا ءبىلىم العان.
سونداي-اق حالىق ساناعىنىڭ دەرەگىنە سايكەس، وزبەكستاننىڭ ءبىلىم بەرۋ ۇيىمدارىندا جەتى جاستان اسقان 9,6 ميلليون ادام ءبىلىم الادى. ونىڭ 4,95 ميلليونى (%51,5) - ەرلەر، ال 4,66 ميلليونى (%48,5) - ايەلدەر.
جوعارى وقۋ ورىندارىندا 1,73 ميلليون ادام ءبىلىم الىپ جاتىر. ولاردىڭ 49 پايىزى - ايەلدەر.
بۇعان دەيىن وزبەكستاندا حالىق سانى ءبىر جىلدا 700 مىڭ ادامعا وسكەنى حابارلانعان بولاتىن.