ويىل وزەنىنىڭ ەكى بەتىنە كۇنىنە 480 ادامدى قايىقپەن الىپ وتەمىز- قۇتقارۋشى
اقتوبە. KAZINFORM -اقتوبە قالاسىنداعى №2 جانە №3 قۇتقارۋ بەكەتتەرىنىڭ قۇتقارۋشىلارى قازىر ويىل اۋدانىندا ءجۇر. ولار ون كۇن بويى ادامدار مەن گۋمانيتارلىق كومەكتى قايىقپەن تاسىدى. بۇل جۇمىس ءالى جالعاسىپ جاتىر.
اقتوبە وبلىسى ويىل اۋدانىندا 29-ناۋرىز كۇنى توتەنشە جاعداي جاريالانىپ، قالادان توتەنشە جاعدايلار قىزمەتكەرلەرى جىبەرىلدى.
قۇتقارۋشىلاردىڭ تىزىمىنە 6 قىزمەتكەر ەنگەن. ولار: ن بوزشين، ا. قۇتتىبايەۆ، ش. تۇرماعانبەت، ر. ماليكوۆ، ا. ابدۋللين، ر. حارۆەنكو. سودان بەرى 10 كۇننەن استام ۋاقىت وتسە دە قۇتقارۋشىلار تىنىمسىز جۇمىس ىستەپ جاتىر.
«ءبىز 29-ناۋرىز بەن 1-ءساۋىر كۇندەرى ويىل اۋدانىنىڭ قاراتال اۋىلىندا بولدىق. سۋ تاسقىنى كەزىندە ادامدار مەكتەپكە قونىستانعان ەكەن. العاشقى كەزدەرى اۋىل ءىشىن بىلمەي، باعامداۋ جۇمىسى ءجۇردى. قاي جەردە سۋ تەرەڭ، قاي ماڭ ىڭعايلى ەكەنىن بارىپ، تەكسەرىپ كوردىك. ءسويتىپ ءبىز مەكتەپتە قالعان ادامداردى قايىقپەن الىپ شىعىپ، تىكۇشاققا جەتكىزدىك. سونىمەن بىرگە مەكتەپكە گۋمانيتارلىق كومەك تاسىمالدادىق. ءتورت كۇن سوندا ءوتتى. قاراتال اۋىلىنا بارعان كەزدە ءبىز ءوزىمىز تاسجول بويىندا ۇيىقتاپ شىقتىق. قۇتقارۋشىلارعا ارنالعان ارنايى قاپ بولدى. مەكتەپكە دە بارۋعا بولاتىن ەدى. ءبىراق وندا ادام كوپ، مازالاعىمىز كەلمەدى»، - دەدى №2 قۇتقارۋ بەكەتىنىڭ جەتەكشى نۇربول بوزشين.
كەيىن قۇتقارۋشىلار ويىل اۋدانىنىڭ ورتالىعىندا وزەننىڭ ەكى بەتىنە ادامداردى، ارنايى مامانداردى تاسۋعا كوشتى.
«قازىرگى كەزدە جاعداي قالىپقا تۇسە باستادى، جۇمىس جۇيەلەندى. ءبىزدىڭ مىندەتىمىز وزەننىڭ ەكى بەتىنە ادام تاسۋ. جۇمىس تاڭەرتەڭ 7:00 دە باستالادى. ساعات 20:00 گە دەيىن سوندا جۇرەمىز. ءبىراق كەيدە ادامدار «ارعى بەتكە بارۋىم كەرەك، قوناتىن جەرىم جوق»، دەپ ءوتىنىش ايتىپ، قاۋىپتى بولسا دا ساعات 22:00 گە دەيىن ءجۇرىپ قالامىز. سونىمەن بىرگە قايىقپەن گاز قۇبىرىن جوندەيتىن، ەلەكتريكتەردى دە تاسيمىز. كەشە عانا اۋدانعا كوپىردىڭ جارامدىلىعىن تەكسەرەتىن ارنايى ماماندار كەلىپ، ولاردىڭ فوتوعا تۇسىرۋىنە جاعداي جاسالدى»، - دەدى نۇربول بوزشين.
ويىل اۋدانىندا وبلىستىق توتەنشە جاعدايلار دەپارتامەنتىنىڭ ەكى قايىعى بار. وزەننىڭ ەكى بەتىنە تاسيتىن تەمىر قايىققا 5-6 ادام، ال موتورلى رەزەڭكە قايىققا 3-4 ادام مىنە الادى. قۇتقارۋشىلار شۇعىل مەديتسينالىق كومەكپەن جەتكىزىلگەن ناۋقاستارعا، قاريالارعا، ارنايى ماماندارعا باسىمدىق بەرەدى.
«كۇنىنە 80-100 رەيس جاسايمىز. قايىقپەن وزەننىڭ ەكى بەتىنە 480-490 ادام تاسىمالدانادى. ويىل وزەنىنەن ءقازىر تۋرا تاسىپ جاتقان جوقپىز. سەبەبى تۋرا جولى باتپاق، ادامدار جۇرە المايدى. سوندىقتان 2 شاقىرىمنان اساتىن اينالما جاسايمىز. بۇل مەنىڭ تۋعان جەرىم، ءبىراق اقتوبە قالاسىنداعى جەدەل قۇتقارۋ جاساعىندا جۇمىس ىستەيمىن. بۇل جۇمىستا جۇرگەنىمە 17 -جىل بولدى. سودان بەرى ءتۇرلى قۇتقارۋ جۇمىستارىنا قاتىستىم. ال قايىقتى ايداپ جۇرگەنىمە 10 -جىلعا جۋىق ۋاقىت بولدى»، - №2 قۇتقارۋ بەكەتىنىڭ جەتەكشى نۇربول بوزشين.
ايتا كەتەيىك، نۇربول بوزشين توتەنشە جاعدايلار قىزمەتىندە جۇمىسىن 2007 -جىلى باستادى. الدىمەن سۇڭگۋىر بولدى. كەيىن №1 قۇتقارۋ بەكەتى ءبىرىنشى بولىمشە كومانديرى قىزمەتىن اتقارىپ، 2019 -جىلدان باستاپ №2 قۇتقارۋ بەكەتىنىڭ جەتەكشىسى.
«توتەنشە جاعداي بولعان سوڭ ادامدار كەيدە العىس ايتادى، كەيدە رەنجيدى. ءبىز كەزەك قويماي، تاسي بەرەمىز. كەيبىرى بۇرىن ءمىنىپ كەتىپ، قالىپ قويعانى وكپەسىن ءبىلدىرىپ جاتادى. قۇتقارۋشىلار ءۇزىلىسسىز جۇمىس ىستەيدى. قاجەتتى تاماقتى جاعاعا اكەلەدى نەمەسە جاعادا تۇرعان كيىز ۇيدەن اۋقاتتانىپ كەلەدى. مۇنىڭ ءبارى رەتتەلىپ، ۇيىمداستىرىلعان»، - دەدى ول.
