وڭىرلەردەگى تاسقىننان كەيىن سۋدىڭ ساپاسىن تولىقتاي تەكسەرۋ كەرەك - مامان
استانا. KAZINFORM - سۋ شارۋاشىلىعى سالاسىنىڭ ارداگەرى، ينجەنەر-گيدروتەحنيك، حالىقارالىق ارالدى قۇتقارۋ قورىنىڭ قازاقستانداعى اتقارۋشى ديرەكتسياسىنىڭ باس مامانى ءامىرحان كەنشىموۆ تاسقىننان كەيىنگى سۋ ساپاسىنىڭ وزگەرۋى جاعدايىنا پىكىر ءبىلدىردى.
«مەنىڭ ويىمشا، سۋدىڭ ساپاسىن زەرتتەۋ ءبىراز جەردە جۇرگىزىلگەن جوق. ويتكەنى، مۇنىڭ ءبارى بەلگىلى ءبىر دارەجەدە كۇتپەگەن جاعداي بولدى. جالپى، سۋ باساتىن وڭىرلەردە سۋ ساپاسىنا ساراپتاما جاساۋ قاجەت. سۋ باسقان ايماقتاردا دالاداعى دارەتحانالار دا، سەپتيكتەر، كارىز جۇيەسى دە كوپ بولدى. مۇنىڭ ءبارى سۋ استىندا قالدى. ەكىنشىدەن، كوپتەگەن مال سۋعا باتتى. ەگەر ولەكسەلەر دەر كەزىندە تابىلىپ جويىلماسا، بۇل دا قاۋىپ توندىرەدى. بۇل جاعدايدا ىندەتتىڭ تارالۋ قاۋپى ارتادى. سونىمەن قاتار، حيميالىق زاتتار مەن تىڭايتقىشتاردىڭ قويمالارى دا سۋ استىندا قالۋى ىقتيمال»، - دەدى ءا. كەنشىموۆ Kazinform تىلشىسىنە بەرگەن سۇحباتىندا.
بۇل تۇرعىدا ول وسىنداي جاعدايدا مىندەتتى تۇردە سۋدىڭ ساپاسىنا تولىقتاي ساراپتاما جاساۋ كەرەك ەكەنىن اتاپ ءوتتى.
«ءبىز تاسقىن سۋدىڭ قايدا اعىپ بارعانىن قاراۋىمىز كەرەك. ەگەر قايتادان وزەندەرگە تۇسسە، وندا سىنامالاردى سول جەردەن الۋ قاجەت. وزەندەردە گيدروحيميالىق بەكەتتەر بار، وندا جۇيەلى تۇردە سۋدىڭ ساپاسىنا تالداۋ جاسالۋى كەرەك. كاسپي تەڭىزى مەن كولدەرگە ءبىراز سۋ اعىپ باردى. سوندىقتان ولاردىڭ ساپاسىن تەكسەرۋ ماڭىزدى. مۇنىڭ ءبارى اۋقىمدى جۇمىس جانە وعان قوماقتى قاراجات كەرەك. ياعني، وسى جۇمىستار نەعۇرلىم جىلدام باستالسا، سوعۇرلىم تەزىرەك اۋرۋدىڭ تارالۋىن بولدىرماۋ مۇمكىندىگى جاسالادى. وسىنىڭ بارلىعىن تەكسەرۋ كەرەك. بۇل پروتسەسكە تەك گيدرومەتەورولوگيالىق ستانتسيالاردى عانا ەمەس، سونىمەن قاتار ۆەتەرينارلىق زەرتحانالار مەن سانيتارلىق- ەپيدەميولوگيالىق قىزمەتتەردى دە تارتۋ كەرەك سياقتى»، - دەدى مامان.
