وڭىرلەردەگى مەملەكەتتىك قىزمەتشىلەردىڭ جالاقىسىن كوتەرۋ ۇسىنىلدى

استانا. KAZINFORM - بۇگىن سەناتتا وڭىرلەردىڭ بيۋجەتتىك دەربەستىگى تاقىرىبىنا ارنالعان دوڭگەلەك ۇستەل وتىرىسىندا قاراعاندى وبلىسى اكىمىنىڭ ورىنباسارى ەرمەك الپىسوۆ مەملەكەتتىك قىزمەتشىلەردىڭ جالاقىسىن كوتەرۋگە قاتىستى ۇسىنىس ايتتى.

«ماڭىزدى ماسەلەلەردىڭ ءبىرى جەرگىلىكتى اتقارۋشى ورگاندار مەن ريەۆيزيالىق كوميسسيالارداعى مەملەكەتتىك قىزمەتشىلەردىڭ جەكەلەگەن ساناتتارىنا جالاقى دەڭگەيىنىڭ تومەندىگىنە قاتىستى. ستاتيستيكاعا قاراعاندا، قاراعاندى وبلىسىندا 2023-جىلداعى ورتاشا جالاقى 367 مىڭ تەڭگەنى، ال قازاقستان بويىنشا 394 مىڭ تەڭگەنى قۇرادى. بۇل رەتتە، وبلىسىمىزداعى ءىرى كاسىپورىنداردا مىقتى ماماندار 800 مىڭنان 1 ميلليون تەڭگەگە دەيىن تابىس الادى. اۋداندىق دەڭگەيدەگى ا بلوگىنداعى باس ماماننىڭ لاۋازىمدىق جالاقىسى ەڭبەك وتىلىنە قاراي ەڭ كوپ دەگەندە 260 مىڭ تەڭگە، وبلىستىق دەڭگەيدە 302 مىڭ تەڭگە شاماسىندا. سوڭعى رەت قىزمەتكەرلەردىڭ لاۋازىمدىق جالاقىسىن كوتەرۋ 2021-جىلدىڭ 1-شىلدەسىندە جۇزەگە اسىرىلدى»، - دەدى ە. الپىسوۆ.

ونىڭ ايتۋىنشا، قازىر مەملەكەتتىك قىزمەتتە جاقسى كادرلاردىڭ اۋىسۋى جيىلەدى. ادامدار تاجىريبە جيناقتاپ، جالاقىسى جوعارى جۇمىسقا كەتىپ جاتىر.

«ءبىز جالاقىنى كەم دەگەندە ەلىمىزدەگى ورتاشا ايلىق (394 مىڭ تەڭگە) دەڭگەيىنە دەيىن جەتكىزۋ ماسەلەسىن قاراستىرۋدى ۇسىنىپ وتىرمىز. سونداي-اق مەملەكەتتىك قىزمەتشىلەردىڭ جۇمىسىن باعالاۋ ناتيجەلەرى بويىنشا بونۋس مولشەرىن ەكى جالاقىدان ءتورت جالاقىعا دەيىن ارتتىرۋدى ۇسىندىق»، - دەدى قاراعاندى وبلىسى اكىمىنىڭ ورىنباسارى.