وڭىرلەردىڭ ءوز بورىشىن وتەۋدە جاۋاپكەرشىلىگى ارتادى
استانا. KAZINFORM - قازاقستاندا وڭىرلىك دەڭگەيدە مەملەكەتتىك بورىشتى باسقارۋ تيىمدىلىگىن ارتتىرۋ بويىنشا شارالار قابىلداندى. قاجەتتى جۇمىستى ۇلتتىق ەكونوميكا مينيسترلىگى جوعارى اۋديتورلىق پالاتانىڭ نۇسقاماسى بويىنشا جۇرگىزدى.
بۇرىن جۇرگىزىلگەن مەملەكەتتىك اۋديت شەڭبەرىندە وسى سالادا ءبىرقاتار كەمشىلىك انىقتالعان بولاتىن.
- «جۇمىسپەن قامتۋ جول كارتاسى» اياسىندا جەرگىلىكتى اتقارۋشى ورگانداردىڭ باسقا كرەديتورلار الدىنداعى قارىزىن وتەۋگە جۇمسالعان شىعىس جالپى سيپاتتاعى ترانسفەرتتەردى ەسەپتەۋ كەزىندە ەسكەرىلگەن. بۇل ورتالىققا بورىشتىق جۇكتەمە تۇسىرەدى. جەرگىلىكتى جەردە قارىز الۋ ليميتتەرى (كىرىستەردىڭ %10 ىنان اسپايتىن) كەي جاعدايلاردا ساقتالمايدى. ال جەرگىلىكتى اتقارۋشى ورگانداردىڭ ليميتتى ساقتاماعانى ءۇشىن جاۋاپتىلىعى كوزدەلمەگەن. جالپى قارىزدى باسقارۋ ءارتۇرلى ادىسپەن جۇزەگە اسىرىلىپ كەلگەن، - دەلىنگەن جوعارى اۋديتورلىق پالاتا حابارلاماسىندا.
وسىعان بايلانىستى جوعارى اۋديتورلىق پالاتا ۇ ە م- گە نورماتيۆتىك-قۇقىقتىق بازاعا قاجەتتى وزگەرىستەر ەنگىزۋ ارقىلى انىقتالعان ولقىلىقتاردى جويۋدى تاپسىردى.
ناتيجەسىندە جاڭا بيۋدجەت كودەكسىنە (2025-جىلعى 15-ناۋرىزدا قول قويىلعان) ءبىرقاتار ءتيىستى تۇزەتۋ ەنگىزىلدى:
ەندى جەرگىلىكتى قارىزداردى وتەۋگە ارنالعان شىعىستار ورتالىق دەڭگەيدە قالىپتاساتىن وڭىرلەردىڭ جالپى شىعىندارىنىڭ بولجامىنا (ءبىلىم بەرۋ، مەديتسينا، ينفراقۇرىلىم جانە ت. ب.) ەنگىزىلمەيدى. بۇل وڭىرلەرگە ولاردى وتەۋ بويىنشا باسىم جاۋاپتىلىق بەكىتەدى؛
جەرگىلىكتى اتقارۋشى ورگاندار بورىشىنىڭ ليميتتەرى پرەزيدەنت جارلىقتارىمەن بەكىتىلەتىن نىسانالى باعدارلار ەسكەرىلە وتىرىپ ايقىندالادى؛
ليميتتەردىڭ ساقتالماعانى ءۇشىن وبلىستاردىڭ، رەسپۋبليكالىق ماڭىزى بار قالالاردىڭ جانە استانانىڭ اكىمدەرى تىكەلەي جاۋاپتى بولادى.
سونىمەن قاتار تومەن تۇرعان بيۋجەتتىڭ سالىقتىق جانە سالىقتىق ەمەس كىرىستەرىن اسىرا ورىنداۋ سومالارى ەندى توقسانىنا ءبىر رەت ولاردىڭ بورىشتىق مىندەتتەمەلەرىن وتەۋگە جانە جوعارى تۇرعان جەرگىلىكتى بيۋجەتتەردىڭ باسىم الەۋمەتتىك شىعىسىن قارجىلاندىرۋعا باعىتتالادى.
- بۇل ءتاسىل بيۋدجەتتەردىڭ دەربەستىك قاعيداتتارىن نىعايتۋعا، بورىشتىق جۇكتەمەنى قىسقارتۋعا، قارجىلىق ءتارتىپتى ارتتىرۋعا جانە بيۋجەت قاراجاتىن تيىمدىرەك بولۋگە مۇمكىندىك بەرەدى، - دەلىنگەن حابارلامادا.
ايتا كەتەلىك رەسپۋبليكالىق بيۋدجەتتەن بولىنگەن 207 ميلليون تەڭگە ءتيىمسىز جۇمسالعانى تۋرالى جازعان ەدىك.
