وندىرۋشىدەن تۇتىنۋشىعا دەيىن: قازاقستاندا ەتتىڭ ۇستەمە باعاسى قالاي تومەندەتىلمەك

اۋىل شارۋاشىلىعى مينيسترلىگى ءوندىرۋشى مەن تۇتىنۋشى اراسىنداعى باعا ايىرماسىن ازايتۋ ءۇشىن فەرمەرلەردىڭ ءونىمىن دەلدالسىز ساتۋعا مۇمكىندىك بەرەتىن ساۋدا ورىندارىن كوبەيتۋدى ۇسىندى.

مۇنى الماتى وبلىسىندا جۋرناليستەرگە ارنالعان باسپا ءسوز تۋرى بارىسىندا اۋىل شارۋاشىلىعى ۆيتسە-ءمينيسترى ازات سۇلتانوۆ مالىمدەدى.

ونىڭ ايتۋىنشا، اۋىل شارۋاشىلىعى تاۋارىن وندىرۋشىلەر ساتاتىن ەتتىڭ باعاسى شارۋاشىلىقتىڭ ساناتىنا جانە مالدىڭ قوڭدىلىعىنا بايلانىستى.

- قازىر اۋىل شارۋاشىلىعى تاۋارىن وندىرۋشىلەردىڭ سيىر ەتىن ساتۋ باعاسى شارۋاشىلىقتىڭ ساناتى مەن مالدىڭ قوڭدىلىعىنا قاراي ورتا ەسەپپەن 2800-3300 تەڭگە ارالىعىندا. الايدا ساۋدا سورەلەرىندە جۇمساق ەتتىڭ ءبىر كيلوگرامى 6000 تەڭگەگە دەيىن جەتەتىنىن كورىپ وتىرمىز. سوندىقتان فەرمەر سۇرانىسقا يە ونىم وندىرگەنىمەن، نەگە ودان جاقسى پايدا تاۋىپ، تابىسىن ارتتىرا الماي وتىر دەگەن ورىندى سۇراق تۋىندايدى. وسى باعىتتا اكىمدىكتەر جۇمىس ىستەپ جاتىر، - دەدى ازات سۇلتانوۆ.

اۋىل شارۋاشىلىعى مينيسترلىگى ءوندىرۋشى مەن تۇتىنۋشى اراسىنداعى باعا ايىرماسىن ازايتۋ ءۇشىن فەرمەرلەردىڭ ءوزى تىكەلەي ساتا الاتىن ساۋدا الاڭدارىن دامىتۋدى قاراستىرىپ وتىر.

ۆيتسە-ءمينيستردىڭ ايتۋىنشا، مۇنداي جوبا الماتىدا جۇزەگە اسىرىلعان. قالاداعى كوممۋنالدىق بازارلاردىڭ بىرىندە اۋىل شارۋاشىلىعى وندىرۋشىلەرىنە تاۋارىن دەلدالسىز ساتۋعا مۇمكىندىك بەرىلگەن.

بۇل تاجىريبەنى الماتى وبلىسىندا دا قولدانىپ كورمەك.

- وبلىستا فەرمەرلەرگە ارنالعان بىرنەشە بازار سالۋ جوباسى جۇزەگە اسىرىلادى. وندا سانيتاريالىق تالاپتارعا ساي، ساۋدا جاساۋعا قولايلى جاعداي جاسالادى. وبلىس اكىمىنىڭ تاپسىرماسى بويىنشا مۇنداي ورىندار تەك اۋىل شارۋاشىلىعى تاۋارىن وندىرۋشىلەرگە بەرىلۋى كەرەك. دەلدالدارعا دا، الىپساتارلارعا دا ەمەس، تىكەلەي ءونىم وندىرۋشىلەرگە ۇسىنىلادى، - دەدى ۆيتسە-مينيستر.

اۋىل شارۋاشىلىعى ونىمدەرىن وتكىزۋدىڭ ءىرى ارنالارىنىڭ ءبىرى - «التىن وردا» بازارى. ازات سۇلتانوۆ قىزمەتكەرلەرىنە تاماق جاساۋ ءۇشىن وسى بازاردان ەتتى كيلوگرامىنا شامامەن 3600 تەڭگەدەن ساتىپ الاتىن كاسىپورىنداردىڭ ءبىرىن اتادى.

- كەيبىر ساۋدا ورىندارىندا باعا حالىق ءۇشىن قولايلى ەكەنىن كورىپ وتىرمىز، - دەدى ول.

الماتى وبلىسى ءونىمدى وڭدەۋگە باسىمدىق بەرەدى

ۆيتسە-مينيستر الماتى وبلىسىنىڭ ەلدەگى ەڭ ءىرى قالانى ازىق-تۇلىكپەن قامتاماسىز ەتۋدەگى ماڭىزىن دا اتاپ ءوتتى. ءوڭىر اۋىل شارۋاشىلىعى ونىمدەرىن وندىرەتىن نەگىزگى ايماقتاردىڭ ءبىرى سانالادى. ال الماتىعا جاقىن ورنالاسۋى جەرگىلىكتى شارۋالارعا ءونىمىن وتكىزۋگە قولايلى مۇمكىندىك بەرەدى.

ازات سۇلتانوۆتىڭ ايتۋىنشا، وبلىس اۋىل شارۋاشىلىعى شيكىزاتىن وندىرۋمەن عانا شەكتەلمەي، ونى وڭدەۋگە دە باسىمدىق بەرىپ وتىر.

- مۇندا ەت جانە ءسۇت ونىمدەرىن ءوندىرىسى جاقسى دامىعان. جالپى، الماتى وبلىسى ازىق-تۇلىك سەبەتىنە كىرەتىن نەگىزگى تاۋار توپتارى بويىنشا ءوز قاجەتتىلىگىن ءوزى قامتاماسىز ەتەدى. سونىمەن قاتار ءوندىرىس كولەمى مەن ءونىم تۇرلەرىن كوبەيتۋ باعىتىندا جۇمىس جۇرگىزىپ جاتىر، - دەدى ول.

ەسكە سالساق، اۋىل شارۋاشىلىعى مينيسترلىگى شارۋالارعا سۋبسيديا تۇرلەرىن 2 ەسەدەي قىسقارتقان ەدى.