ويشىل اقىن شاكارىم قۇدايبەردى ۇلىنىڭ تۋعانىنا - 166 جىل

استانا. KAZINFORM - بۇگىن اقىن، جازۋشى، فيلوسوف، تاريحشى، كومپوزيتور شاكارىم قۇدايبەردى ۇلىنىڭ تۋعانىنا 166 جىل تولدى.

شاكارىم ءوزى ءومىر سۇرگەن ورتانىڭ قوعامدىق-ساياسي جانە الەۋمەتتىك سىر-سيپاتىن كورە بىلۋدە، قوعام مەن ادام تابيعاتىنداعى كەمشىلىكتەردى زەردەلەۋدە، تۋعان حالقىنا جول كورسەتۋدە اباي باعىتىن ۇستاندى.

سىرشىل اقىننىڭ قالامىنان تەرەڭ ويلى، ليريكالىق ولەڭدەر، «قالقامان- مامىر»، «ەڭلىك- كەبەك»، «نارتايلاق- ايسۇلۋ» سياقتى داستاندار، «ءادىل-ءماريا» رومانى جانە باسقا دا پروزالىق تۋىندىلار، اۋدارمالار، تاريحقا، فيلوسوفياعا قاتىستى ەڭبەكتەر، سازدى اندەر تۋدى.

قالامگەردىڭ «تۇرىك، قىرعىز، قازاق ءھام حاندار شەجىرەسى»، «قازاق ايناسى»، «قالقامان- مامىر»، «جولسىز جازا ياكي كەز بولعان ءىس»، «ەڭلىك- كەبەك»، «ءۇش انىق»، «مۇسىلماندىق شارتى»، «ءلايلى- ءماجنۇن» ت. ب. شىعارمالارى جارىق كورگەن.

شاكارىم اندەرى قازاق كومپوزيتورلارىنىڭ شىعارمالارىنا ارقاۋ بولدى.

احمەت جۇبانوۆتىڭ «اباي» سيۋيتاسىنىڭ ءبىرىنشى بولىمىنە، ا. جۇبانوۆ پەن ل. حاميديدىڭ «اباي» وپەراسىنداعى ايداردىڭ اريوزوسىنا، ايدار مەن اجاردىڭ دۋەتىنە سازگەردىڭ شىعارمالارى پايدالانىلدى.

ۇلى تۇلعانىڭ «بۇل ءان بۇرىنعى اننەن وزگەرەك»، «جاستىق تۋرالى»، «انادان العاش تۋعانىمدا» اتتى اندەرى نازىك، كوڭىلدى قوزعايتىن سىرشىلدىعىمەن جۇرەكتەن ءوز ورنىن الدى.