وگەي اكەلەردى تەكسەرۋ بويىنشا جۇمىس جۇرگىزىلىپ جاتىر - ىشكى ىستەر مينيسترلىگى
پوليتسەيلەر ءۇشىن وتباسىندا زورلىققا ۇشىراعان كامەلەتكە تولماعاندارمەن جۇمىس ىستەۋ الگوريتمى دايىندالدى.
بۇل تۋرالى ىشكى ىستەر مينيسترلىگى اكىمشىلىك پوليتسيا كوميتەتىنىڭ ءتوراعاسى قايسار سۇلتانبايەۆ ايتتى.
ونىڭ ايتۋىنشا، وگەي اكەلەردى تەكسەرۋ بويىنشا جۇمىس جۇرگىزىلىپ جاتىر.
«بۇگىندە زاڭ جوباسىنا ءبىراز ۇسىنىس دايىندالعان. قازىر ولار قاراستىرىلىپ جاتىر. سونداي-اق، ەلىمىزدە اجىراسقان وتباسىلار بار. ايەل اجىراسىپ، ەكىنشى رەت تۇرمىسقا شىققاندا، وتباسىندا وزىمەن بىرگە كامەلەتكە تولماعان قىز بولادى. وسىنداي جاعدايدا بىرگە تۇرىپ جاتقان وگەي اكەسى سول جاس وسپىرىمدەرگە كەيدە زورلىق-زومبىلىق جاسايتىن فاكتىلەر بولادى. ونى ءبىز بىلەمىز. ول سونشاما كوپ بولماسا دا دەرەكتەر بار»، - دەدى كوميتەت ءتوراعاسى ۇكىمەتتىڭ باسپا ءسوز ورتالىعىندا.
قايسار سۇلتانبايەۆ پوليتسەيلەر وتباسىندا زورلىققا ۇشىراعان جاس وسپىرىمدەرمەن سويلەسىپ ۇيرەنەتىنىن جەتكىزدى. ول ءۇشىن ارنايى الگوريتم جاسالعان.
«ىشكى ىستەر مينيسترلىگى كامەلەتكە تولماعانداردىڭ ىستەرى جونىندەگى ۋچاسكەلىك پوليتسيا ينسپەكتورلارىنا ارنايى الگوريتم جاسادى. كامەلەتكە تولماعان قىزدار نەمەسە ولاردىڭ شەشەلەرى ارىز تۇسىرگەندە، ارىزدى قالاي قاراۋ كەرەك، پوليتسيا سول وتباسىعا كەلگەندە، ءبىرىنشى كىممەن سويلەسۋ كەرەك، قانداي ماسەلەگە كوڭىل اۋدارۋ قاجەت، قانداي سۇراقتار قويۋ كەرەك دەگەن ماسەلەلەر قامتىلعان.
جاس ءوسپىرىمنىڭ كوڭىل-كۇيىن، دەنە جاراقاتى بار-جوعىنا تالداۋ جاساۋعا قاتىستى الگوريتم جاساپ دايىندالدىق. الگوريتمدى قىزمەتكەرلەرگە بەردىك. سونداي ارىز تۇسكەندە، ءبىزدىڭ قىزمەتكەرلەر سول الگوريتم بويىنشا جۇمىس ىستەيدى. قازىر زاڭ جوباسى دايىندالىپ جاتىر»، - دەدى اكىمشىلىك پوليتسيا كوميتەتىنىڭ ءتوراعاسى.
ەسكە سالايىق، بۇعان دەيىن پرەزيدەنت كامەلەتكە تولماعاندارعا جاسالعان زورلىق-زومبىلىق ءۇشىن جازانى قاتاڭداتۋدى تاپسىرعانى حابارلانعان ەدى.
