گوگولدىڭ «ءولى جاندارى» پاۆلودار مەكتەپتەرىن ءالى دە جاعالاپ ءجۇر

پاۆلودار. KAZINFORM - مەكتەپ ديرەكتورى جالعان قىزمەتكەردى جۇمىسقا قابىلداۋ ارقىلى بيۋدجەتتەن 2,5 ميلليون تەڭگە قاراجات جىمقىرعان. قازىر وعان قاتىستى سوتقا دەيىنگى تەرگەۋ باستالدى.

پروكۋرورلار پاۆلودار قالاسىنداعى مەكتەپ ديرەكتورلارىنىڭ ءبىرى ءىرى كولەمدەگى بيۋدجەت قاراجاتىن ۇرلاعانىن اشكەرەلەدى. ول ءبىلىم ۇياسىنا الدەبىر ازاماتتى جۇمىسقا الىپ، سونىڭ اتىنا اي سايىن ەڭبەكاقى اۋدارىپ وتىرعان. تۇپتەپ كەلگەندە الگى ازامات مەكتەپتە جۇمىس ىستەمەگەن. ءسويتىپ گوگولدىڭ ايگىلى «ءولى جاندار» شىعارماسىنىڭ كەزەكتى كەيىپكەرى اتانىپ وتىر.

«ديرەكتوردىڭ قىزمەتكەردى جۇمىسقا جالعان ورنالاستىرۋ ارقىلى 2,5 ميلليون تەڭگە يەمدەنۋ فاكتىسى انىقتالدى. ماتەريالدار سىبايلاس جەمقورلىققا قارسى قىزمەتكە جولداندى. قىلمىستىق كودەكستىڭ 189-بابى (سەنىپ تاپسىرىلعان بوتەننىڭ مۇلكىن يەمدەنۋ نەمەسە جىمقىرۋ) بويىنشا سوتقا دەيىنگى تەرگەپ-تەكسەرۋ جۇرگىزىلىپ جاتىر» دەپ حابارلادى وڭىرلىك پروكۋراتۋرادان.

سونىمەن قاتار پروكۋرورلار پاۆلودار قالاسىنىڭ بارلىق مەكتەپتەرىندە بەينەباقىلاۋ كامەرالارى جازۋ فۋنكتسيالارىسىز جۇمىس ىستەيتىنىن انىقتادى. ولاردىڭ بەينە مۇراعاتتارىنا كىرۋ مۇمكىندىگى جوق جانە پوليتسيانىڭ جەدەل باسقارۋ ورتالىعىنا قوسىلماعان.

بۇل كەمشىلىك 2023 -جىلى «Smart City Pavodar» جوباسى اياسىندا تۇزەتىلۋگە ءتيىس بولاتىن، الايدا جەتكىزۋشىنىڭ شارتتىق مىندەتتەمەلەردى ورىنداماۋىنا بايلانىستى ءالى ىسكە اسىرىلماعان.

جەرگىلىكتى اتقارۋشى ورگاندار وعان قاتىستى نارازىلىق-تالاپ قويۋ جۇمىستارىن جۇرگىزىپ جاتىر.

بارلىق انىقتالعان فاكتىلەر بويىنشا پروكۋرورلىق قاداعالاۋ شارالارى قابىلداندى.

ەسكە سالا كەتەيىك، بۇعان دەيىن پاۆلوداردا بالاباقشا ديرەكتورى مەن بۋحگالتەرى قازىنادان 62 ميلليون تەڭگە جىمقىرعانى تۋرالى حابارلاعان ەدىك.