وتىز جىلدا ەكى زاڭ عانا قازاقشا جازىلعان - سەناتور

پارلامەنت سەناتىنىڭ دەپۋتاتى، الەۋمەتتىك- مادەني دامۋ جانە عىلىم كوميتەتىنىڭ ءتوراعاسى نۇرتورە ءجۇسىپ زاڭداردىڭ مەملەكەتتىك تىلدە جازىلۋى ءۇشىن قانداي شارالار قولعا الىنعانىن ايتىپ بەردى، دەپ حابارلايدى Kazinform.

«30 جىلدا ەكى اق زاڭ مەملەكەتتىك تىلدە ازىرلەنگەن. ەڭ ءىرىسى - اكىم ىسقاق نەگىزدەگەن «كوشى-قون تۋرالى زاڭ» جانە فاريزا وڭعارسىنوۆا اتسالىسقان بالالارعا بايلانىستى ىلەسپە زاڭ. قالعاندارى ورىسشا جاسالادى. زاڭدى بۇرىن ۇكىمەت ءوزى جاسايتىن. زاڭ جوبالارى ادىلەت مينيسترلىگىندە تۇجىرىمداما جاسالادى، سوسىن پارلامەنتكە ۇسىنىلادى. سول كەزدە بارلىق زاڭداردىڭ ماتىندەرى ورىس تىلىندە تۋىپ، قازاق تىلىنە اۋدارىلادى. بۇل تاجىريبە ءالى دە جالعاسۋدا»، - دەدى دەپۋتات Jibek joly تەلەارناسىنداعى ۋادە» باعدارلاماسىندا.

نۇرتورە ءجۇسىپ بۇل جەردە ۇلكەن ماسەلە اۋدارمادا ەكەنىن باسا ايتتى.

«سەنات العاش كەلىپ، زاڭنىڭ قازاقشا ماتىندەرىن قاراعاندا وتە ورەسكەل قايشىلىقتاردى كوردىك. ءتىپتى ماكەدونيامەن اراداعى راتيفيكاتسيا بويىنشا سىرتقى ىستەر مينيسترلىگىنە، باس پروكۋراتۋراعا ارنايى حات جولداپ، ول نوتا ماكەدونياعا جولدانىپ، ءبىر ايدان كەيىن مەملەكەتتىك تىلدەگى ءماتىندى دۇرىستاپ قايتارعان جاعداي بولدى. پارلامەنت تاريحىندا مۇنداي وقيعا بولماعان. قازىر ارىپتەستەرمەن اقىلداسا كەلە، جوبالىق كەڭسە قۇردىق، وعان سەنات ءتوراعاسىنىڭ ورىنباسارى جاقىپ اسانوۆ مىرزا جەتەكشىلىك ەتەدى. قازىر زاڭداردى مەملەكەتتىك تىلدە ازىرلەۋ ماسەلەسى تۋرالى ەكى-ءۇش وتىرىس وتكىزدىك. وسىعان بايلانىستى دەپۋتاتتار باستاماسىمەن جاڭا زاڭ جوباسىن ازىرلەۋ مۇمكىندىگى بار. تاياۋدا ۇكىمەتتىڭ وڭ قورىتىندىسىن الدىق، عىلىم تۋرالى زاڭعا وزگەرىستەر مەن تولىقتىرۋلار ەنگىزۋ ماسەلەسىنە قاتىستى زاڭدى نەگىزىنەن مەملەكەتتىك تىلدە جاساپ، سودان ورىس تىلىنە اۋدارىپ، ءماجىلىس قاراۋىنا ۇسىنامىز»، - دەدى سەنات دەپۋتاتى.

سپيكەردىڭ ايتۋىنشا، سەنات پورتفەلىندە باسقا دا زاڭ جوبالارى بار جانە 2024 -جىلى سول زاڭدار نەگىزىنەن مەملەكەتتىك تىلدە ازىرلەنەدى.

«ءبارى ويداعىداي بولسا سەنات باستاماسىمەن كەلەسى سەسسياعا دەيىن 5-6 زاڭ قابىلدانىپ قالۋى مۇمكىن. سوعان وراي تاجىريبەلى، بىلىكتى اۋدارماشىلارمەن، ادىلەت مينيسترلىگىنىڭ ماماندارىمەن، زاڭگەرلەرىمەن جۇمىس ىستەپ جاتىرمىز. قازاق ءتىلىن جاقسى بىلەتىن ماماندار بار، مەملەكەتتىك تىلدە زاڭ دايارلاۋدىڭ ەش قيىندىعى جوق»، - دەيدى نۇرتورە ءجۇسىپ.