فوتوسۋرەتىڭىزدى رۇقساتسىز جاريالاسا، نە ىستەۋ كەرەك

Nofake.kz مۇنداي سحەمالاردىڭ قالاي جۇمىس ىستەيتىنىن انىقتادى.

TikTok پەن باسقا دا الەۋمەتتىك جەلىلەردە ادامداردىڭ فوتوسۋرەتتەرىن رۇقسات ەتىلمەگەن ميتينگىلەرگە شاقىرۋ ءۇشىن پايدالاناتىن جاعدايلار كەزدەسەدى. سالدارىنان فوتودا بەينەلەنگەن ازاماتتار سول ۇندەۋلەردى قولداپ وتىرعانداي نەمەسە ءتيىستى حابارلامالاردى وزدەرى تاراتىپ جاتقانداي اسەر قالىپتاسادى.

مۇنداي جازبالار كوپشىلىك جاپپاي قولداۋ ءبىلدىرىپ جاتقانداي جالعان كورىنىس قالىپتاستىرادى. سونىمەن قاتار، ءارتۇرلى اككاۋنتتاردان تاراعان حابارلامالاردى اۋديتوريا قوعامدىق كوزقاراس دەپ قابىلدايدى. الايدا مۇنىڭ ءبارى ادەيى جاسالۋى مۇمكىن جانە ول ادامداردىڭ شىنايى كوڭىل كۇيىن كورسەتپەيدى.

فوتوسۋرەتتىڭ ءوزى ونداعى ادامنىڭ سۋرەتپەن بىرگە جاريالانعان كوزقاراستى قولدايتىنىن، بەلگىلى ءبىر ۇندەۋدى قۇپتايتىنىن نەمەسە قانداي ءدا بىر وقيعاعا قاتىساتىنىن دالەلدەمەيدى. ەگەر ادامنىڭ سۋرەتى ونىڭ كەلىسىمىنسىز وزگە بىرەۋدىڭ ماتىنىمەن بىرگە جاريالانسا، مۇنداي جازبا قولدانۋشىلاردى جاڭىلىستىرىپ، ونىڭ بەدەلىنە نۇقسان كەلتىرۋى مۇمكىن.

مۇنداي ارەكەتتەردەن قانداي زاڭبۇزۋشىلىق بەلگىلەرى بايقالۋى مۇمكىن؟

فوتوسۋرەتتىڭ ناقتى قالاي پايدالانىلعانىنا، ونىمەن بىرگە قانداي مالىمەتتەر جازىلعانىنا جانە ونىڭ سالدارىنا قاراي قۇقىقتىق باعا بەرىلەدى. وزگە ادامنىڭ بەينەسىن پايدالانۋ جانە تاراتۋ دەربەس دەرەكتەر تۋرالى زاڭناماعا، سونداي-اق ادامنىڭ ءوز بەينەسىنە قۇقىعىن رەتتەيتىن ازاماتتىق زاڭناما نورمالارىنا قاتىستى بولۋى مۇمكىن. ادام تۋرالى كورىنەۋ جالعان مالىمەت بەرگەن نەمەسە وعان ايتپاعان ءسوزى مەن جاساماعان ارەكەتتى تەلىپ، جالا جاپقاندار زاڭ الدىندا جاۋاپ بەرەدى.

ەگەر فوتوسۋرەتتەر زاڭعا قايشى ارەكەتتەردى كوپشىلىك جاپپاي قولداپ جاتقانداي جالعان اسەر قالدىرۋ ءۇشىن پايدالانىلسا، مۇنداي ماتەريالداردى تاراتقاندار دا جەكە قۇقىقتىق باعالاۋدى قاجەت ەتۋى مۇمكىن.

قازاقستان زاڭناماسىندا نە قاراستىرىلعان؟

قازاقستاندا فوتوسۋرەتتەردى پايدالانۋ ماسەلەلەرى، اتاپ ايتقاندا، ازاماتتىق كودەكسپەن جانە «دەربەس دەرەكتەر جانە ولاردى قورعاۋ تۋرالى» زاڭمەن رەتتەلەدى. بۇل رەتتە فوتوسۋرەتتى پايدالانۋدىڭ زاڭدىلىعى ونى الۋ جانە تاراتۋعا، ادامنىڭ كەلىسىمىنىڭ بولۋىنا جانە زاڭدا كوزدەلگەن وزگە دە تالاپتارعا بايلانىستى.

قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنىڭ 79-بابىندا دەربەس دەرەكتەر جانە ولاردى قورعاۋ تۋرالى زاڭنامانى بۇزۋدىڭ جەكەلەگەن تۇرلەرى ءۇشىن جاۋاپكەرشىلىك كوزدەلگەن. ايىپپۇل مولشەرى قۇقىق بۇزۋدىڭ قۇرامىنا جانە قۇقىق بۇزۋشىنىڭ ساناتىنا بايلانىستى بولادى.

الايدا وزگەنىڭ فوتوسۋرەتىن پايدالانۋ بارلىق جاعدايدا زاڭ بۇزۋ بولىپ سانالمايدى. جاۋاپكەرشىلىك بار-جوعىن انىقتاۋ ءۇشىن جازبانىڭ ءمان-جايى مەن زاڭ تالاپتارى ەسكەرىلەدى.

فوتوسۋرەتتەرىڭىزدى قالاي قورعاۋعا بولادى؟

قۇپيالىق باپتاۋلاردى تەكسەرىڭىز. فوتوسۋرەتتەرىڭىزدى جانە باسقا دا جەكە جازبالارىڭىزدى كورە الاتىن پايدالانۋشىلاردىڭ شەڭبەرىن شەكتەڭىز.

ارتىق جەكە مالىمەتتەردى جاريالاماڭىز. مەكەنجاي، جۇمىس ورنى، قۇجات دەرەكتەرى جانە باسقا دا جەكە اقپارات ءسىزدىڭ بەينەڭىزدى تەرىس ماقساتتا پايدالانۋدى جەڭىلدەتۋى مۇمكىن.

فوتوسۋرەتتەرىڭىزدىڭ قايدا جاريالانعانىن تەكسەرىڭىز. ءول ۇشىن Google سۋرەتتەر نەمەسە ياندەكس سۋرەتتەر سەرۆيستەرىندەگى سۋرەت بويىنشا ىزدەۋ فۋنكسياسىن پايدالانۋعا بولادى. مۇنداي ىزدەۋ اشىق دەرەككوزدەردەگى فوتوسۋرەتتەردىڭ كەيبىر كوشىرمەلەرىن تابۋعا كومەكتەسەدى. الايدا ول بارلىق جاريالانىمدى انىقتاۋعا كەپىلدىك بەرمەيدى.

دالەلدەردى ساقتاپ قويىڭىز. فوتوسۋرەتىڭىزدىڭ كەلىسىمىڭىزسىز پايدالانىلعانىن انىقتاساڭىز، سكرينشوت جاساڭىز، جازبانىڭ سىلتەمەسىن، جاريالانعان كۇنىن جانە اككاۋنت اتاۋىن ساقتاڭىز.

پلاتفورما اكىمشىلىگىنە شاعىمدانىڭىز. وزگە ادامنىڭ اتىنان ارەكەت ەتۋ، قۇپيالىقتى بۇزۋ نەمەسە بەينەنى زاڭسىز پايدالانۋ تۋرالى حابارلاۋعا ارنالعان قولجەتىمدى قۇرالداردى پايدالانىڭىز.

قاجەت بولسا، قۇزىرلى ورگاندارعا جۇگىنىڭىز. ەگەر فوتوسۋرەتىڭىز الاياقتىق جاساۋ، قورقىتۋ، جالعان مالىمەتتەر تاراتۋ نەمەسە سىزگە وزگە بىرەۋدىڭ كوزقاراستارى مەن ارەكەتتەرىن تەلۋ ءۇشىن پايدالانىلسا، پوليتسياعا جۇگىنۋگە نەمەسە زاڭگەردەن كەڭەس الۋعا بولادى.

الەۋمەتتىك جەلىدەگى اشىق پروفيلدەن الىنعان سۋرەتتى پايدالانىپ، ادامعا ءوزى ايتپاعان ءسوزدى نەمەسە قولدامايتىن پىكىردى تاڭۋعا بولمايدى. بىرەۋدىڭ سۋرەتى ونىڭ جازباداعى پىكىرمەن كەلىسەتىنىن بىلدىرمەيدى. سوندىقتان مۇنداي اقپاراتتى بىردەن شىندىق دەپ قابىلداماي، الدىمەن تەكسەرگەن ءجون. زاڭ بۇزۋ انىقتالسا، ءتيىستى ورگاندارعا حابارلاۋ قاجەت.

ايتا كەتەلىك اسكەر تۋرالى فەيك ءبىر جىلدان كەيىن قايتا تاراعان ەدى.