وڭتۇستىكتەن سولتۇستىككە كوشكىسى كەلەتىندەر قاتارى كوبەيۋدە

تۇركىستان. KAZINFORM- ەلىمىزدە سوڭعى جىلدارى سولتۇستىككە كوش جۇيەلى تۇردە ۇيىمداستىرىلىپ كەلەدى. بيىل رەسپۋبليكا بويىنشا 7050 كۆوتا ءبولىنىپ، قانداستار مەن قونىس اۋدارۋشىلار ءۇشىن مەملەكەتتىك قولداۋ كورسەتەتىن 7 وبلىس بەلگىلەندى. سونىڭ ىشىندە بيىلعى 9 ايدا تۇركىستان وڭىرىنەن 300-دەي وتباسى، ياعني 1200-گە جۋىق جان قونىس اۋدارعان.

بۇگىن سولتۇستىك قازاقستان وبلىسىنان ارنايى كەلگەن وكىلدەرمەن وبلىس اكىمىنىڭ ورىنباسارى بەيسەنباي تاجىبايەۆ كەزدەستى. جيىن بارىسىندا كوشى-قون ماسەلەسى مەن ارنايى بەيىمدەلۋ ورتالىعىن اشۋ جايى جان-جاقتى تالقىلاندى.

- بۇگىندە مەملەكەت تاراپىنان ەڭبەك كۇشى ارتىق وڭىرلەردەن تاپشى وڭىرلەرگە قونىس اۋدارۋ پروتسەسى ءجۇرىپ جاتىر. وزدەرىڭىز بىلەسىزدەر، ءبىزدىڭ وڭىردە 2 ميلليون 200 مىڭعا جۋىق تۇرعىن بار، ياعني حالىق سانى تىعىز ورنالاسقان. دەموگرافيالىق ءوسىم دە جوعارى. وبلىس باسشىسى دارحان امانگەلدى ۇلى ءوڭىردىڭ نەگىزى پروبلەمالارىنىڭ ءبىرى بولعان جۇمىسسىزدىق دەڭگەيىن ازايتۋ جانە تۇرعىنداردىڭ الەۋمەتتىك جاعدايىن كوتەرۋدىڭ بارلىق مۇمكىن بولعان باعىتتارىن قاراۋدى تاپسىرعان بولاتىن.

اتالعان كوش جۇمىسسىزدىقتى وڭتايلاندىرۋدىڭ نەگىزگى باعدارلامالارىنىڭ ءبىرى دەۋگە بولادى. سولتۇستىك قازاقستان وبلىسىندا دا وزگە 6 وبلىسپەن قاتار قونىس اۋدارۋشىلاردى قابىلداۋ بويىنشا ءىس-شارالار ىسكە اسىرىلۋدا. ول جاققا كوشىپ بارۋشىلارعا ءبىراز ۋاقىتقا دەيىن جان-جاقتى قولداۋ قاجەت. سىزدەر ۇسىنىپ وتىرعان بەيىمدەۋ ورتالىعى ۇتىمدى شەشىم بولماق. بۇل باستامانى كاسىپكەرلەر مەن دەمەۋشىلەردىڭ تىكەلەي قولداۋىمەن جۇزەگە اسىرۋعا بولادى دەپ ويلايمىن. بۇل ماسەلە كۇن تارتىبىنەن تۇسپەۋ كەرەك، - دەدى وبلىس اكىمىنىڭ ورىنباسارى.

سولتۇستىك قازاقستان وبلىسى، پەتروپاۆل قالاسىنىڭ قانداستار مەن قونىس اۋدارۋشىلارعا ارنالعان اقپاراتتىق-ءتۇسىندىرۋ ورتالىعىنىڭ جەتەكشىسى ءانۋار توقپان وسى باعىتتا سولتۇستىك وڭىردەگى اتقارىلىپ جاتقان جۇمىستارمەن تانىستىردى. ونىڭ ايتۋىنشا العاش رەت وڭتۇستىك ايماقتاردان تۇرعىنداردى كوشىرۋ جوباسى 2015 -جىلى باستالعان. الايدا پاندەميا جىلدارى ءۇزىلىپ، بىلتىردان باستاپ قايتا قولعا الىنعان. تاۋەلسىزدىك العان جىلدارى 1 ميلليونعا جۋىق بولعان وڭىردە بۇگىندە 530 مىڭ عانا تۇرعىن بار. سولتۇستىك قازاقستان وبلىسىنا جىل باسىنان بەرى ەل اۋماعىنان 412 وتباسى، ياعني 1200-دەن استام ادام قونىس اۋدارىپ، 70 وتباسى 125 قانداستاردى قابىلداعان.

«تاۋەكەل» قوعامدىق بىرلەستىگىنىڭ ءتوراعاسى بۋراحان داقانوۆ الدىمەن قۋانىشتى جاڭالىق جەتكىزدى.

تاياۋدا وتكەن ۇلتتىق مەرەكە قارساڭىندا اتالعان وبلىستا 5 انا «التىن القا» السا، ونىڭ 3 ۋى تۇركىستان وبلىسىنان كوشىپ بارعاندار ەكەن. قونىس اۋدارۋشىلار ءۇشىن مەملەكەت وتباسىنىڭ ءاربىر مۇشەسىنە 258440 تەڭگە مولشەرىندە ماتەريالدىك كومەك كورسەتەدى، دەگەنمەن كوشى-قون ماسەلەسىن وڭتايلاندىرۋ ءۇشىن بۇل سومانى كوبەيتۋ قاجەت دەپ سانايمىن دەيدى ۇيىم جەتەكشىسى.

سونىمەن قاتار، تۇرعىن ءۇيدى جالداۋ مەن كوممۋنالدىق قىزمەت شىعىندارىن وتەۋگە جاردەم بەرىلەدى. ودان بولەك، ءبىلىم الۋعا، كاسىپكەرلىكتى دامىتۋعا جانە جۇمىسقا ورنالاسۋعا كومەك كورسەتىلەدى. ال بىلتىردان باستاپ كوشىپ بارعان ازاماتتارعا تۇرعىن ءۇي ساتىپ الۋ نەمەسە سالۋ ءۇشىن ونىڭ قۇنىنىڭ 50 پايىزىن بەرۋ كوزدەلىپتى.

اتالعان ۇيىم جەتەكشىلەرى وبلىستىڭ اۋدان، قالالارىندا كەزدەسۋ وتكىزىلەدى. بۇعان دەيىن سايرام مەن ورداباسى اۋدانىندا جانە تۇركىستان قالاسىندا وتكەن كەزدەسۋ ارىس قالاسىندا، شاردارا مەن ماقتاارال، جەتىساي مەن كەلەس، سارىاعاش پەن قازىعۇرت اۋدانىندا جالعاسادى. وندا جۇمىس ىزدەپ سولتۇستىككە كوشكىسى كەلگەن تۇرعىندار كوكەيدەگى ساۋالدارىن قويىپ، «مانساپ» ورتالىقتارىندا جان-جاقتى ماعلۇمات الا الادى.

ايتا كەتەيىك، بيىل جىل باسىنان بەرى وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامار باسقارماسىمەن ەكى رەت تۇركىستان وبلىسىنان ەرىكتى قونىس اۋدارۋشىلارعا ارنالعان «قونىس اۋدارۋ» جارمەڭكەلەرى وتكىزىلىپ، وعان اباي، قاراعاندى، پاۆلودار، سولتۇستىك قازاقستان، ۇلىتاۋ، شىعىس قازاقستان وبلىستارىنىڭ وكىلدەرى قاتىستى. ناتيجەسىندە قونىس اۋدارۋعا قىزىعۋشىلىق تانىتىپ، نيەت بىلدىرگەندەر قاتارى كوبەيۋدە.

اۆتور

قايرات زاينيشەۆ