وڭتۇستىك كورەياداعى زاڭدى جۇمىس: كەلىسسوز قاشان اياقتالادى

ونىڭ ايتۋىنشا، بۇل كەلىسسوزدەردىڭ ۇزاق جۇرۋىنە وڭتۇستىك كورەيا باسشىلىعىنىڭ اۋىسۋىنا قاتىستى بولعان پروتسەسس اسەر ەتكەن.

- كەلىسسوزدەردىڭ (EPS جۇيەسىنە ەنگىزۋ) ءۇش كەزەڭى بار. ءبىز ءبىرىنشى كەزەڭىنەن وتكەن ەدىك. الايدا وڭتۇستىك كورەيا پرەزيدەنتىنىڭ اۋىسۋىنا بايلانىستى وسى ماسەلە جارتى جىلعا تۇرالاپ قالدى. جاڭا پرەزيدەنت قىزمەتىنە كىرىسكەننەن كەيىن بۇل ەلدەگى ەڭبەك مينيسترلىگى وسى جۇمىستاردى جانداندىردى. قازىر ەكىنشى كەزەڭ اياسىندا كەلىسسوزدى جالعاستىرىپ جاتىرمىز. بۇل رەتتە الماتى قالاسىندا EPS ورتالىعىن اشۋ جوسپارلانعان. ولار وسى عيماراتتاردى قاراپ، بەلگىلەدى. ەندى سول عيماراتتا EPS ورتالىعىن اشۋعا اكىمشىلىكپەن ءتيىستى جۇمىستى جۇزەگە اسىرىپ جاتىرمىز. بۇل اقپاراتتىڭ ءبارىن كورەياعا جولدادىق. بارلىعى كەلىسىمنەن وتسە، وندا ولار كەلىسسوزدى پرەمەر-مينيستر دەڭگەيىندەگى ءۇشىنشى كەزەڭگە شىعارادى، - دەدى ا. ەرتايەۆ ۇكىمەتتەگى باسپا ءسوز ءماسليحاتىندا.

وسى ورايدا مينيستر وڭتۇستىك كورەيا قازاقستاندى EPS جۇيەسىنە ەنگىزۋ تۋرالى تۇپكىلىكتى شەشىم قابىلداۋعا كىرىسەتىنىن ايتتى. بۇل ءىس-شارالار جىل سوڭىنا دەيىن اياقتالۋى مۇمكىن.

- ولارمەن تۇراقتى بايلانىستامىز. قازاقستان ەلشىلىگى ەرەكشە ءمان بەرىپ وتىر. بۇل ەلدە 10 مىڭ قازاقستان ازاماتى زاڭسىز ءجۇر، - دەدى ۆەدومستۆو باسشىسى.

ەسكە سالساق، ءبىراز جىلدان بەرى وڭتۇستىك كورەيادا قازاقستان ازاماتتارى زاڭسىز جۇرگەنى جايىندا ايتىلىپ كەلەدى. ەڭبەك مينيسترلىگىنىڭ باسشىلىعى قازاقستان ازاماتتارىنىڭ زاڭدى تۇردە جۇمىس ىستەۋىنە قاتىستى ءىس- شارالار 2024-جىلدىڭ سوڭىنا دەيىن اياقتالۋى مۇمكىن ەكەنىن ايتقان ەدى. ودان بەرى ءبىر جىلدان استام ۋاقىت ءوتتى.

ايتا كەتەيىك، EPS جۇيەسى (Employment Permit System) ءوز جۇمىسىن 2004-جىلدىڭ 1-تامىزىندا باستادى جانە قازىرگە دەيىن بۇل جۇيە بويىنشا 20 عا جۋىق ەلدىڭ ازاماتى وڭتۇستىك كورەيادا جۇمىس ىستەي الادى.

بۇل جۇيەدەگى جۇمىس قىزمەت كورسەتۋ، ءوندىرىس، قۇرىلىس، اۋىل شارۋاشىلىعى جانە بالىق اۋلاۋ سالالارىندا ۇسىنىلادى. EPS جۇيەسى شەتەلدىككە وڭتۇستىك كورەيادا 3 جىلعا دەيىن جۇمىس ىستەۋگە مۇمكىندىك بەرەدى، سونداي-اق جۇمىسشىلارمەن كەلىسىمشارت ۇزارتىلۋى مۇمكىن.

بۇل ازاماتتارعا وسى ەلدە 4 جىل 10 ايعا دەيىن تۇرۋعا مۇمكىندىك بەرەدى. EPS جۇيەسىنە قاتىسۋ ءۇشىن كورەيا جاعى EPS دايىندىق ورتالىقتارىنا بارۋدى تالاپ ەتەدى. بۇل ورتالىقتاردا وڭتۇستىك كورەيادا جۇمىسقا ورنالاسقىسى كەلەتىندەر ءتىلدى ۇيرەنۋ كۋرستارىنان، كوشى-قونى جانە مەديتسينالىق ماسەلەلەرگە قاتىستى تەستىلەۋدەن وتەدى.