وڭتۇستىك كورەيادا زاڭسىز جۇرگەن وزبەكستاندىقتار 10 كۇندە ەلدەن كەتۋى ءتيىس
تاشكەنت. KAZINFORM - وزبەكستاننىڭ سىرتقى ەڭبەك كوشى- قونى اگەنتتىگى وڭتۇستىك كورەيادا زاڭسىز جۇرگەن وزبەكستاندىقتاردى 29-اقپانعا دەيىن ەلدەن كەتۋگە شاقىردى، دەپ حابارلايدى Kazinform اگەنتتىگىنىڭ تاشكەنتتەگى مەنشىكتى ءتىلشىسى.
ۆەدومستۆودان مالىمدەگەندەي، وڭتۇستىك كورەيادا زاڭسىز جۇرگەن وزبەكستاندىقتار ەلدىڭ يمميگراتسيالىق قىزمەتىنە جوسپارلانعان كەتۋ كۇنىنەن 3 كۇن بۇرىن ەرىكتى تۇردە ءوتىنىش بەرۋى قاجەت. بۇل ءراسىم بارىسىندا ولار قۇزىرلى ورگان ماماندارىنا پاسپورت پەن ۇشاق بيلەتىن قوسا ۇسىنۋى ءتيىس.
سايكەسىنشە، كوشى-قون قىزمەتى بەرگەن سەرتيفيكات نەگىزىندە وزبەكستاندىقتار ءوز ەلىنە ەش قيىندىقسىز ورالا الادى.
سىرتقى ەڭبەك كوشى-قونى اگەنتتىگىنىڭ دەرەگىنشە، وڭتۇستىك كورەيادان ءوز ەركىمەن كەتۋ تۋرالى شەشىم قابىلداعان ازاماتتار دەپورتاتسيالانبايدى. ەگەر وزبەكستاندىقتار ءوتىنىش ارقىلى ەلدەن شىقسا، وندا ولارعا سول مەملەكەتكە زاڭدى تۇردە قايتا كىرۋىنە مۇمكىندىك بەرىلەدى.
ەربول جانات
