وڭتۇستىك كورەيادا جولاۋشىلار ۇشاعى اپاتقا ۇشىرادى: 47 ادام قازا تاپتى
استانا. KAZINFORM - وڭتۇستىك كورەيانىڭ مۋان حالىقارالىق اۋەجايىندا بورتىندا 181 ادامى بار جولاۋشىلار ۇشاعى اپاتقا ۇشىراپ، كەم دەگەندە 47 ادام قازا تاۋىپ، تاعى كوپ ادام جارالاندى. بيلىك وكىلدەرىنىڭ ايتۋىنشا، قۇتقارۋ، تەرگەۋ جۇمىستارى جالعاسۋدا.
جەكسەنبى كۇنى تاڭەرتەڭ وڭتۇستىك كورەيانىڭ مۋان حالىقارالىق اۋەجايىنا قونعان كەزدە بورتىندا 181 ادامى بار Jeju Air جولاۋشىلار ۇشاعى اپاتقا ۇشىراپ، كەم دەگەندە 47 ادام قازا تاۋىپ، كوپتەگەن ادام جاراقات الدى. زارداپ شەككەندەردىڭ ناقتى سانىن انىقتاۋ جالعاسۋدا.
اپات تاڭعى ساعات 9:07 دە ورىن الدى، ۇشاق ۇشۋ- قونۋ جولاعىنان سىرعىپ شىعىپ، قورشاۋعا سوقتىعىستى، كەيىن ءورت پايدا بولدى.
بيلىك ۇشاقتىڭ ارتىنان تابىلعانداردىڭ بارلىعىنىڭ قازا بولعانىن راستاپ، ولاردىڭ سانى ارتۋى مۇمكىن ەكەنىن ەسكەرتتى.
يونحاپ اقپارات اگەنتتىگىنىڭ حابارلاۋىنشا، قازىرگە دەيىن 3 ادام قۇتقارىلعان. جولاۋشىلاردىڭ كوپشىلىگى وڭتۇستىك كورەيا ازاماتتارى، سونداي-اق ەكى تايلاند ازاماتى بولعان.
توتەنشە جاعدايلار قىزمەتى اپات ورنىندا ىزدەستىرۋ- قۇتقارۋ جۇمىستارىن جۇرگىزۋدە. جەرگىلىكتى اقپارات قۇرالدارىنىڭ حابارلاۋىنشا، اپاتتىڭ سەبەبى ءالى بەلگىسىز.
پرەزيدەنتتىڭ مىندەتىن اتقارۋشى چوي سانگ-موك بارلىق ءتيىستى مەكەمەلەرگە قۇتقارۋ جۇمىستارىنا نازار اۋدارۋدى جانە توتەنشە جاعدايلار قىزمەتىنىڭ قاۋىپسىزدىگىن قامتاماسىز ەتۋدى تاپسىردى.
تەرگەۋشىلەر قايعىلى وقيعاعا نە سەبەپ بولعانىن انىقتاۋ ءۇشىن وقيعا ورنىندا ءجۇر.
