وڭتۇستىك كورەيادا ۇشاق اپاتىنان كەيىن 68 مىڭ جولاۋشى اۋە بيلەتىن كەرى قايتارعان
استانا. KAZINFORM — وڭتۇستىك كورەياداعى ۇشاق اپاتىنان كەيىن تۇرعىندار اۋە ساپارلارىنان باس تارتىپ جاتىر. بۇل تۋرالى 24.kz سايتى جازدى.
ەكى كۇندە 68 مىڭ بيلەت كەرى قايتارىلعان. كوبى اپاتقا ۇشىراعان «چەدجۋ ەير» كومپانياسىنا تيەسىلى. سوندىقتان تۋريستىك اگەنتتىكتەر ءدال وسى تاسىمالداۋشىنىڭ رەيستەرىنەن باس تارتقان جولاۋشىلاردان ايىپپۇل الماي جاتىر.
ولار كليەنتتەرىنە وزگە ءىرى اۋە كومپانيالارىن ۇسىنىپ، بيلەتتەرىن اۋىستىرىپ بەرىپ جاتىر. 29 جەلتوقساندا وڭتۇستىك كورەيانىڭ مۋان قالاسىنىڭ حالىقارالىق اۋەجايىندا بوينگ 737-800 لاينەرى ۇشۋ-قونۋ جولاعىنان شىعىپ كەتىپ، بەتون قورشاۋعا سوعىلعان. ارتىنشا جارىلىس بولىپ، سوڭى ورتكە ۇلاسقان. سالدارىنان بورتىنداعى 181 ادامنىڭ تەك ەكەۋى عانا ءتىرى قالدى.
اپاتقا اۋە كەمەسىنىڭ دوڭگەلەگىندەگى اقاۋ سەبەپ بولۋى مۇمكىن. ال كەشە ءدال وسى كومپانيانىڭ ءدال وسى مودەلدەگى باسقا ۇشاعىندا دوڭگەلەگىنە قاتىستى پروبلەما تۋىنداپ، لاينەر اۋەجايعا ورالعان. بۇل وقيعالاردان كەيىن بيلىك بوينگ 737-800 ۇلگىسىندەگى بارلىق ۇشاقتى تەكسەرۋ تاپسىرماسىن بەردى. جەرگىلىكتى اۋە تاسىمالداۋشىلاردىڭ كوبى وسى ۇشاقتاردى ءجيى قولدانادى.
ەسكە سالا كەتەيىك، جويقىن ۇشاق اپاتىنان كەيىن وڭتۇستىك كورەيادا Boeing 737-800 ۇشاقتارى تۇگەل تەكسەرىلگەلى جاتقانىن جازعان ەدىك.
