وڭتۇستىك كورەيادا قۇرىلىستا جۇرگەن قازاقستان ازاماتى قازا تاپتى
سەۋلدەگى قۇرىلىس الاڭىندا بەتون جابىندىنىڭ ءبىر بولىگى قۇلاپ، قازاقستان ازاماتى قازا تاپتى. بۇل اقپاراتتى سىرتقى ىستەر مينيسترلىگى راستادى.
«كورەيا رەسپۋبليكاسىنىڭ قۇزىرلى ورگاندارى وقيعا بويىنشا تەرگەۋ جۇمىستارىن باستادى. ديپلوماتتار قازا تاپقان ازاماتتىڭ تۋىستارىمەن بايلانىس ورناتىپ، ولارعا كونسۋلدىق-قۇقىقتىق كومەك كورسەتىپ جاتىر»، دەلىنگەن ءسىم حابارلاماسىندا.
وقيعا 29-قىركۇيەكتە وڭتۇستىك كورەيا استاناسىنىڭ سوچحو اۋدانىندا بولعان. Yonhap اگەنتتىگىنىڭ مالىمەتىنشە، جاسى 30 دار شاماسىنداعى ەر ادام سالىنىپ جاتقان تۇرعىن ءۇي كەشەنىنىڭ 23-قاباتىندا پاتەردەگى تازالىق جۇمىستارىن جۇرگىزبەك بولعان. سول ساتتە ونىڭ ۇستىندەگى بەتون وپىرىلىپ قۇلاعان.
وقيعادان كەيىن وڭتۇستىك كورەيانىڭ ەڭبەك مينيسترلىگى نىسانداعى قۇرىلىس جۇمىستارىن ۋاقىتشا توقتاتىپ، پوليتسيامەن بىرلەسىپ تەرگەۋ باستاعان. ماماندار ەڭبەك قاۋىپسىزدىگى تالاپتارىنىڭ بۇزىلۋى مۇمكىن ەكەنىن دە تەكسەرىپ جاتىر.
