وڭتۇستىك كورەيادا جۇرگىزۋشىنى قورقىتىپ، كولىگىن بۇلدىرگەن قازاقستان ازاماتى قاماۋعا الىندى

وڭتۇستىك كورەيالىق ب ا ق-تىڭ مالىمدەۋىنشە، وقيعا 29-شىلدەدە ساعات 23:40 شاماسىندا بولعان. 21 جاستاعى قازاقستان ازاماتى 25 جاستاعى وتانداسىمەن بىرگە ىشىندە جۇرگىزۋشى مەن جولاۋشىسى بار جەڭىل اۆتوكولىكتى قۋدالاعان. كەيىن ولار كولىكتىڭ جولىن بوگەپ، ىشىندەگى ادامدارعا قوقان- لوقى كورسەتە باستاعان. ەر ادامداردىڭ ءبىرى كولىكتىڭ الدىڭعى بولىگىن تەپكەن. وقيعانىڭ بارلىعى بەينەتىركەگىشكە ءتۇسىپ قالعان.

العاشىندا كۇدىكتىلەردىڭ كىم ەكەنى انىقتالماعان. قاراڭعىدان بەينەجازباداعى كولىك ءنومىرىن وقۋ مۇمكىن بولماعاندىقتان، قىركۇيەك ايىنىڭ ورتاسىنا قاراي ءىس ءتىپتى اشىلماعان ىستەر ساناتىنا ەنگىزىلگەن.

قوعام مەن بۇقارالىق اقپارات قۇرالدارىنىڭ سىنىنان كەيىن پوليتسيا 21-قىركۇيەكتە تەرگەۋ جۇمىستارىن قايتا جانداندىرعان. كريميناليستيكالىق قىزمەت ماماندارى بەينەتىركەگىش جازباسىنداعى كولىك ءنومىرىنىڭ ءبىر بولىگىن قالپىنا كەلتىرگەن. بۇدان كەيىن پوليتسەيلەر الەۋمەتتىك جەلىلەردى تالداپ، كۇدىكتىلەردىڭ ءبىرىنىڭ جەكە باسىن انىقتاعان.

وڭتۇستىك كورەيادا قارا جۇمىسشى بولىپ ەڭبەك ەتكەن 21 جاستاعى قازاقستان ازاماتى 16-قازاندا انسون قالاسىندا ۇستالدى. ال 18-قازاندا ەدجۋ قالاسىنداعى سۋۆون وكرۋگتىك سوتىنىڭ بولىمشەسى ونىڭ قاشىپ كەتۋ قاۋپى بار ەكەنىن ەسكەرىپ، قاماۋعا الۋعا سانكتسيا بەرگەن.

وعان بىرنەشە ايىپ، سونىڭ ىشىندە اۋىرلاتىلعان ءمان-جايلارداعى قورقىتۋ جانە بوتەننىڭ مۇلكىن ءبۇلدىرۋ ايىپتارى تاعىلىپ وتىر.

جاۋاپ الۋ كەزىندە ەر ادام ءوز ارەكەتىن مويىنداعانىمەن، وقيعاعا قاتەلىك سەبەپ بولعانىن ايتقان. ونىڭ سوزىنشە، بۇعان دەيىن ول كولىگىن باسقا شەتەلدىك ازاماتقا ساتپاق بولعان، الايدا مامىلە جۇزەگە اسپاعان. كەرى قايتىپ بارا جاتقاندا، جابىرلەنۋشىنىڭ كولىگىن جاڭادان تانىسقان الەۋەتتى ساتىپ الۋشىنىڭ كولىگى دەپ قاتە ويلاپ، سوڭىنان قۋا باستاعانىن مالىمدەگەن.

وقيعاعا قاتىسى بار دەگەن ەكىنشى كۇدىكتى - 25 جاستاعى قازاقستان ازاماتى. ونىڭ تانىسى ۇستالعان كەزدە بۇل ازامات كوشى-قون زاڭناماسىن بۇزعانى انىقتالىپ، وڭتۇستىك كورەيادان ءماجبۇرلى تۇردە شىعارىلعانى بەلگىلى بولدى.

بۇعان دەيىن وسى ايدىڭ باستاپقى تۇسىندا سەۋلدەگى قۇرىلىس الاڭىندا بەتون جابىندىنىڭ ءبىر بولىگى قۇلاپ، قازاقستان ازاماتى قازا تاپقانى تۋرالى حابارلاعان ەدىك.

شىڭعىس مۇقايەۆ

Egemen.kz