وڭتۇستىك كورەيا پرەزيدەنتىنە قاتىستى قاماۋعا الۋ شەشىمى سوت ارقىلى كۇشىن جويدى
استانا. KAZINFORM - جۇما كۇنى سوت قىزمەتىنەن شەتتەتىلگەن پرەزيدەنت يۋن سوك ەلدى قاماۋدان بوساتۋ تۋرالى شەشىم شىعاردى، دەپ حابارلايدى Yonhap.
2025-جىلدىڭ 15-قاڭتارىندا تەرگەۋشىلەر يۋن سوك ەلدى 3-جەلتوقساندا اسكەري جاعداي ەنگىزۋىنە بايلانىستى بۇلىككە شاقىردى دەگەن ايىپپەن قاماۋعا الدى.
سەۋلدىڭ ورتالىق اۋداندىق سوتى بۇل شەشىمدى يۋننىڭ ادۆوكاتتارى قاماۋعا الۋ شەشىمىن جويۋ تۋرالى ءوتىنىش بەرگەننەن كەيىن، شامامەن ءبىر ايدان سوڭ شىعاردى.
ادۆوكاتتاردىڭ ايتۋىنشا، يۋنعا تاعىلعان ايىپ زاڭسىز بولعان، ويتكەنى پروكۋراتۋرا ونى 26-قاڭتاردا رەسمي تۇردە جاريالاعان، ياعني ونى ۇستاۋ مەرزىمى اياقتالعاننان كەيىن ءبىر كۇن وتكەن سوڭ.
پروكۋراتۋرا ايىپتىڭ زاڭدى مەرزىمدە تاعىلعانىن العا تارتتى. ولاردىڭ ايتۋىنشا، قىلمىستىق-پروتسەسسۋالدىق كودەكس بويىنشا بۇل مەرزىم كۇندەر بويىنشا ەسەپتەلۋى ءتيىس، ال يۋننىڭ ادۆوكاتتارى ساعات جانە مينۋت بويىنشا ەسەپتەۋ كەرەك دەپ تالاپ ەتكەن.
سوت بۇل داۋعا قاتىستى شەشىم شىعارىپ، قاماۋدا ۇستاۋ مەرزىمى ساعاتپەن ەسەپتەلۋى كەرەك ەكەنىن ءتۇسىندىردى.
بۇعان دەيىن ءبىز وڭتۇستىك كورەياداعى ساياسي داعدارىستىڭ استارلى تۇستارى جايلى جازعان ەدىك. يۋن سوك ەلگە قاتىستى سوت پروتسەسىن سوزا بەرۋ وڭتۇستىك كورەيانىڭ ساياسي جۇيەسىنە ءتيىمسىز. دەگەنمەن، ەل دەموكراتياسىنا ءتان بارلىق راسىمدەردى تولىق ساقتاۋ ماڭىزدى بولىپ قالا بەرەدى.
ايتا كەتەلىك وڭتۇستىك كورەيا سوتى يۋن سوك ەل يمپيچمەنتى بويىنشا سوڭعى تىڭداۋ وتكىزگەن ەدى.
