وڭتۇستىك كورەيا پرەزيدەنتى بۇلىك شىعاردى دەگەن ايىپپەن كەلىسپەيدى
استانا. KAZINFORM - وڭتۇستىك كورەيا پرەزيدەنتى يۋن سوك ەل جاڭا تەلەۇندەۋ جاساپ، وندا وتكەن اپتادا اسكەري جاعداي ەنگىزۋ دۇرىس شەشىم بولعانىن ايتىپ، بۇلىك شىعاردى دەگەن ايىپتاردى جوققا شىعاردى، دەپ حابارلايدى BBC.
ۇزاق ءسوز سويلەگەن يۋن بۇل شەشىمگە قاتىستى ءوز ويىن ايتىپ، پرەزيدەنتتىك وكىلەتتىگىن وپپوزيتسياعا قارسى «ۇلتتى قورعاۋ جانە مەملەكەت ىستەرىن قالىپقا كەلتىرۋ ءۇشىن» اسكەري جاعداي جاريالاۋ ءۇشىن پايدالانعانىن ەسكە سالدى. بۇل ارەكەتىن «تەرەڭ ساياسي شەشىم» دەپ اتادى.
ول سونداي- اق وتستاۆكاعا كەتۋ تۋرالى ۇندەۋلەردى قابىلداماي، وپپوزيتسيانى «يمپيچمەنتتەردى تەرىس پايدالاندى» دەپ ايىپتاپ، سوڭىنا دەيىن كۇرەسۋگە انت بەردى.
- ماعان يمپيچمەنت جاريالانا ما، نەمەسە تەرگەلەمىن بە، مەن وعان ادال تۇردە قارسى تۇرامىن، - دەپ كەلتىردى Yonhap اگەنتتىگى ونىڭ ءسوزىن.
پرەزيدەنت ءسوز سويلەر الدىندا بيلىكتەگى «حالىق بيلىگى» پارتياسىنىڭ جەتەكشىسى حان دون حۋن يمپيچمەنتتى قولدايتىنىن ايتتى، ال بۇرىن وعان قارسى بولاتىن. دەمالىس كۇندەرى پارلامەنت يۋنعا يمپيچمەنت جاريالاي الماعانى بيلەۋشى پارتيانىڭ ۇستانىمىنا بايلانىستى بولدى. كەلەسى داۋىس بەرۋ سەنبى كۇنى وتەدى.
بۇعان دەيىن وڭتۇستىك كورەيانىڭ ۇلتتىق اسسامبلەياسى وتكەن اپتادا اسكەري جاعداي ەنگىزۋ ارەكەتىنە قاتىستى يۋن سوك ەل مەن جەتى شەنەۋنىكتى تەز ارادا قاماۋعا الۋدى تالاپ ەتەتىن قارار قابىلدادى.
سونداي- اق وڭتۇستىك كورەيا پارلامەنتى پرەزيدەنت يۋن سوك ەلعا قاتىستى ايىپتاۋلاردى تەكسەرۋ ءۇشىن ارنايى پروكۋرور تاعايىنداۋ تۋرالى زاڭ جوباسىن قابىلدادى.
بۇعان دەيىن وڭتۇستىك كورەيا پرەزيدەنتىنە ساپارعا شىعۋعا تىيىم سالىندى. ەلدەن شىعۋعا تىيىم سالۋ يۋن سوك ەل جاريالاعان اسكەري جاعدايعا بايلانىستى تەرگەۋ امالدارى ءۇشىن قاجەت بولدى.
ەسكە سالا كەتسەك، وڭتۇستىك كورەيانىڭ پروكۋراتۋراسى پرەزيدەنتكە قارسى مەملەكەتكە وپاسىزدىق جاسادى دەگەن ايىپ تاعىپ وتىر. وڭتۇستىك كورەيانىڭ بۇرىنعى قورعانىس ءمينيسترى دە مەملەكەتكە وپاسىزدىق جاسادى دەگەن ايىپپەن قاماۋعا الىندى.
سونىمەن قاتار، ۇلتتىق جينالىس پلەنارلىق وتىرىستا پرەزيدەنتكە يمپيچمەنت جاريالاۋ تۋرالى ۇسىنىسقا داۋىس سالدى. بيلىكتەگى «حالىقتىق بيلىك» پارتياسىنىڭ (ح ب پ) ءۇش زاڭ شىعارۋشىسىنان باسقاسى يمپيچمەنت تۋرالى ۇسىنىسقا داۋىس بەرۋگە بويكوت جاريالادى.
