وڭتۇستىك كورەيا قازاقستانعا «اقىلدى فەرما» تەحنولوگياسىن ۇسىنىپ وتىر
استانا. KAZINFORM - مەملەكەت باسشىسى قاسىم-جومارت توقايەۆ قازاقستان- كورەي بيزنەس فورۋمىندا ەكى ەلدىڭ اۋىل شارۋاشىلىعىنداعى بايلانىسى قالاي ءوربيتىنىن ايتتى.

«اۋىل شارۋاشىلىعى سالاسىنداعى ارىپتەستىكتى نىعايتۋ ماڭىزدى. قازاقستاننىڭ اگروونەركاسىپ كەشەنى اۋەلدەن قۋاتتى جانە ءبىزدىڭ اۋىلشارۋاشىلىق ونىمدەر الەمنىڭ 80 نەن استام ەلىنە ەكسپورتتالادى»، - دەدى قاسىم-جومارت توقايەۆ.
مەملەكەت باسشىسى قازاقستان اگروونەركاسىپ كەشەنىن جوعارى تەحنولوگيالىق يندۋستريا رەتىندە جاڭعىرتۋعا نيەتتى ەكەنىن اتاپ ءوتتى.
«بۇگىنگى كەلىسسوز بارىسىندا كورەيا رەسپۋبليكاسىنىڭ پرەزيدەنتى قازاقستاندى «اقىلدى اۋىلشارۋاشىلىق فەرمالار» قاعيداسىنا نەگىزدەلگەن تەحنولوگيامەن قامتاماسىز ەتۋ جونىندە ۇسىنىس جاسادى. مەنىڭ ويىمشا، بۇل - وتە جاقسى ۇسىنىس جانە ءبىز وسى جوبانى جۇزەگە اسىرۋمەن اينالىسامىز. وڭتۇستىك كورەيانىڭ اۋىل شارۋاشىلىعىنداعى جاساندى زەيىنگە، روبوت تەحنيكاسى مەن بيوتەحنولوگياعا نەگىزدەلگەن يننوۆاتسيالىق تەحنولوگيالارىن ەنگىزۋگە اسا مۇددەلىمىز. اسىرەسە تيىمدىلىگى جوعارى، «اقىلدى» جىلىجاي سالۋ تاجىريبەسى ءبىزدىڭ فەرمەرلەردىڭ اراسىندا سۇرانىسقا يە»، - دەدى پرەزيدەنت.