وڭتۇستىك كورەيا پارلامەنتى پرەزيدەنتكە يمپيچمەنت جاريالاۋ ءۇشىن داۋىس بەردى

استانا. KAZINFORM - يمپيچمەنتكە ەلدىڭ ۇلتتىق اسسامبلەياسىنىڭ 300 دەپۋتاتىنىڭ 204 ى قولداۋ ءبىلدىردى، دەپ حابارلايدى Kazinform Yonhap اقپارات اگەنتتىگىنە سىلتەمە جاساپ.

پارلامەنتتىڭ 85 دەپۋتاتى قارسى بولدى، تاعى ۇشەۋى قالىس قالدى، سەگىز داۋىس جارامسىز دەپ تانىلدى.

يمپيچمەنت جاريالاۋ ءۇشىن دەپۋتاتتاردىڭ كەمىندە ۇشتەن ەكى بولىگىنىڭ قولداۋى قاجەت بولدى.

يمپيچمەنت تۋرالى شەشىم ونىڭ كەڭسەسىنە جەتكىزىلگەننەن كەيىن يۋن سوك ەل قىزمەتىنەن بوساتىلادى، ال پرەمەر-مينيستر حان داك سۋ پرەزيدەنتتىڭ مىندەتىن اتقارۋشى بولادى.

بۇعان دەيىن وڭتۇستىك كورەيانىڭ ۇلتتىق اسسامبلەياسى وتكەن اپتادا اسكەري جاعداي ەنگىزۋ ارەكەتىنە قاتىستى يۋن سوك ەل مەن جەتى شەنەۋنىكتى تەز ارادا قاماۋعا الۋدى تالاپ ەتەتىن قارار قابىلدادى.

سونداي- اق وڭتۇستىك كورەيا پارلامەنتى پرەزيدەنت يۋن سوك ەلعا قاتىستى ايىپتاۋلاردى تەكسەرۋ ءۇشىن ارنايى پروكۋرور تاعايىنداۋ تۋرالى زاڭ جوباسىن قابىلدادى.

بۇعان دەيىن وڭتۇستىك كورەيا پرەزيدەنتىنە ساپارعا شىعۋعا تىيىم سالىندى. ەلدەن شىعۋعا تىيىم سالۋ يۋن سوك ەل جاريالاعان اسكەري جاعدايعا بايلانىستى تەرگەۋ امالدارى ءۇشىن قاجەت بولدى.

ەسكە سالا كەتسەك، وڭتۇستىك كورەيانىڭ پروكۋراتۋراسى پرەزيدەنتكە قارسى مەملەكەتكە وپاسىزدىق جاسادى دەگەن ايىپ تاعىپ وتىر. وڭتۇستىك كورەيانىڭ بۇرىنعى قورعانىس ءمينيسترى دە مەملەكەتكە وپاسىزدىق جاسادى دەگەن ايىپپەن قاماۋعا الىندى.

سونىمەن قاتار ۇلتتىق جينالىس پلەنارلىق وتىرىستا پرەزيدەنتكە يمپيچمەنت جاريالاۋ تۋرالى ۇسىنىسقا داۋىس سالدى. بيلىكتەگى «حالىقتىق بيلىك» پارتياسىنىڭ (ح ب پ) ءۇش زاڭ شىعارۋشىسىنان باسقاسى يمپيچمەنت تۋرالى ۇسىنىسقا داۋىس بەرۋگە بويكوت جاريالادى.

بۇرىنعى قورعانىس ءمينيسترى كيم ەن حەن پرەزيدەنت يۋن سوك ەلعا وتكەن اپتادا اسكەري جاعداي ەنگىزۋ ارقىلى بۇلىك شىعارۋعا كومەكتەستى دەگەن ايىپپەن سارسەنبىدە رەسمي تۇردە قاماۋعا الىندى.

زارينا تۋعانبايەۆا