وڭتۇستىك افريكاداعى ستيلفونتەين شاحتاسىنان 78 زاڭسىز كەنشىنىڭ دەنەسى تابىلدى

كەيپتاۋن. KAZINFORM - وڭتۇستىك افريكانىڭ سولتۇستىك - باتىسىنداعى ستيلفونتەين قالاسىنداعى قاراۋسىز قالعان شاحتادا جۇرگىزىلگەن قۇتقارۋ وپەراتسياسىنىڭ العاشقى ءۇش كۇنىندە 78 زاڭسىز كەنشىنىڭ ءمايىتى تابىلدى، دەپ جازادى انادولى.

Оңтүстік Африкадағы Стилфонтейн шахтасынан 78 заңсыз кеншінің денесі табылды
Фото: Анадолы

13- قاڭتاردا ستيلفونتەي شاحتاسىندا باستالعان قۇتقارۋ وپەراتسياسىنىڭ ءۇشىنشى كۇنىندە 216 كەنشى قۇتقارىلدى، ولاردىڭ بارلىعى شاحتادا زاڭسىز بولعان، دەپ حابارلادى وڭتۇستىك افريكا پوليتسياسى قىزمەتى (SAPS) .

- وپەراتسيا بارىسىندا 78 كەنشىنىڭ ءمايىتى شىعارىلعان، ءتىرى قالعان بارلىق كەنشىلەر ۇستالدى، - دەلىنگەن حابارلامادا.

وپەراتسيا «كاننيباليزم» ايىپتارىنان كەيىن باستالعان. وڭتۇستىك افريكانىڭ ادام قۇقىعىن قورعاۋ بويىنشا «تاۋ- كەن ونەركاسىبىنەن زارداپ شەككەن قاۋىمداستىقتاردى بىرىكتىرۋ» (MACUA) ۇيىمى 3 - قاڭتاردا ستيلفونتەين شاحتاسىندا قامالعان كەنشىلەر «اشتىقتان كوز جۇمعان جولداستارىنىڭ دەنەسىن جەپ جاتىر» دەگەن شاعىممەن كونستيتۋتسيالىق سوتقا جۇگىنگەن.

13- قاڭتاردا وڭتۇستىك افريكا ۇكىمەتى كونستيتۋتسيالىق سوتتىڭ شەشىمىنەن كەيىن قۇتقارۋ وپەراتسياسىن باستادى.

پوليتسيا 2024 -جىلدىڭ قاراشاسىندا قاراۋسىز قالعان ستيلفونتەين شاحتاسىنا سۋ مەن ازىق- تۇلىك جەتكىزۋدى توقتاتقاننان كەيىن، بەرىلۋدەن باس تارتقان جۇزدەگەن كەنشى اشتىق پەن شولدەن زارداپ شەكەن.

رەسمي دەرەكتەرگە سايكەس، 15- قاڭتارداعى جاعداي بويىنشا 1806 زاڭسىز كەنشى ستيلفونتەين شاحتاسىن تاستاپ شىعىپ كەتكەن. پوليتسيا ولاردىڭ كوپشىلىگى موزامبيك ازاماتتارى ەكەنىن ايتتى.

جەرگىلىكتى بيلىك وكىلدەرى كەنشىلەر ءوز بەتىمەن شىعا العانىن، ال شاحتادا قالعاندار - قۇقىق قورعاۋ ورگاندارى قاماۋعا الماۋى ءۇشىن قولداناتىن تاكتيكاسى ەكەنىن حابارلاعان.

وڭتۇستىك افريكادا «زاما- زاما» دەپ اتالاتىن كەنىش الماز، التىن جانە پلاتينا سياقتى قۇندى مينەرالدارعا باي. ەلدە 10000 نان 30000 عا دەيىن ادام زاڭسىز كەن وندىرۋمەن تىكەلەي اينالىسادى دەگەن بولجام بار. تەك زاڭسىز التىن ءوندىرۋدىڭ ءوزى ەل ەكونوميكاسىنا جىلىنا ورتا ەسەپپەن 3,8 ميلليارد دوللار شىعىن كەلتىرەدى ەكەن.

سوڭعى جاڭالىقتار